O sector xerou 418 novos empregos no último ano presidido polo auxe tecnolóxico
17 jun 2019 . Actualizado ás 14:08 h.Trinta e dous países enviarán a 400 directivos de empresas relacionados coa pesca e a conserva do atún. Vigo converterase en setembro na capital mundial desta especie acollendo os días 16 e 17 a IX Conferencia Mundial do Atún no que se abordará o futuro desa especie e a súa comercialización. O evento terá lugar en plena expansión deste produto que supón o 70 % das conservas. O secretario xeral de Anfaco, Juan Manuel Vieites destacou que hai que seguir preservando os recursos con pesca «responsable» dun peixe «salvaxe».
A loita contra as capturas ilegais e a trazabilidade son retos en todo o mundo. A conselleira do Mar, Rosa Quintana destacou a importancia do sector en Galicia, como «primeira rexional mundial produtora de atún». España produce ao ano 290.000 toneladas das cales o 87 % procésanse en Galicia. A conserva xera 15.000 empregos directos e máis de 30.000 indirectos.«O 6,5 % do emprego é do sector conserveiro cun 75 % feminino», segundo recalcaron Vieites e Quintana. A pesar da modernización e da aposta pola robotización, a automatización e a intelixencia artificial, segundo Anfaco non se están destruíndo postos de traballo. «Durante o ano pasado xeráronse 418 empregos máis», explicou o secretario xeral da patronal conserveira, que puxo de relevo que «a tecnoloxía está a crear empregos doutros perfís».
Proba diso foi a presenza no acto celebrado na Confederación de Empresarios de Pablo Rodríguez, director de Hermasa, a compaña que fornece maquinaria a fábricas de atún de 65 países e que está a desenvolver un alto nivel de I-D. O mesmo sucede con Marine Instruments. O seu director comercial, Jorge Pérez Bouzada, sinalou que están perfeccionando a tecnoloxía para localizar mellor e de xeito máis eficiencia os bancos de atún, O evento está apoiado por Abanca que puxo en marcha unha linea que se chama Abanca Mar para as empresas do sector, segundo sinalou o seu dirixente José Luis Romero .