AXENDA | O domingo terá lugar unha carreira solidaria a favor de Aviación sen Fronteiras
13 jun 2019 . Actualizado ás 05:00 h.Está aberto o prazo de inscrición para participar na I Carreira Solidaria Aeroporto de Vigo a favor da oenegué Aviación Sen Fronteiras. A proba deportiva terá lugar no aeroporto de Peinador o vindeiro domingo a partir das 10.45 horas.
A carreira, duns 7,5 quilómetros por terreo asfaltado, percorrerá o camiño perimetral que bordea a pista, parte do campo de voos e finalizará no exterior da terminal. A participación na mesma está limitada a 400 corredores de máis de 16 anos (os menores de idade terán que ir acompañados por un responsable maior de idade) e estableceranse dúas categorías, feminina e masculina, con trofeos aos tres mellores tempos de cada unha.
Os máis pequenos tamén poderán participar nesta xornada, a través de distintas probas específicas para eles, que se establecerán en función da idade e terán lugar a partir das 10.00 horas do mesmo día. Para estas probas non hai límite de prazas, aínda que será necesaria a inscrición previa gratuíta (a oenegué aceptará donativos de 3 euros pola inscrición dos menores). Todos os participantes recibirán unha medalla polo seu esforzo.
A oenegué Aviación Sen Fronteiras, que será a beneficiaria do importe total das cotas de inscrición (10 euros), é a responsable da organización da carreira, do rexistro das inscricións e do cobro das cotas.
A inscrición xa está aberta en https://championchipnorte.com/evento/detalle/ide/1824/i-carreira-solidariaaeropuerto-de-vigo.
Debido á singularidade do percorrido, a través da zona de acceso restrinxido do aeroporto, os participantes deberán cumprir unha serie de requisitos entre os que está seguir todas as indicacións do persoal da organización, non levar líquidos, auriculares ou mochilas, e estar no edificio terminal unha hora e media antes do inicio da carreira. Haberá servizo de guardarropa, aparcadoiro e avituallamiento en chegada gratuítos para os participantes.
Será a primeira vez que o aeroporto de Vigo acolle unha proba deportiva deste tipo, a iniciativa de Aviación sen Fronteiras coa que colabora habitualmente. É unha oenegué sen ánimo de lucro e declarada de interese social, que se constitúe en España en 1999. Preto de 400 voluntarios, a maioría vinculados á aviación, dedican o seu tempo libre a algúns dos catro proxectos que concentran a súa actividade. Ás da Esperanza (acompañamento de menores), Mensaxería Solidaria (envío de medicamentos, material médico ou artigos de primeira necesidade), Ás do Sorriso (visitas a aeroportos , avións ou hangares ou viaxes para actividades relacionadas coa aeronáutica) e Alfabetización en Burkina Faso.