David Regades subliña o valor das 11 maiorías absolutas que logrou o PSOE en Pontevedra
VIGO
Os socialistas gobernarán sen necesidade de alianzas Vigo, Vilagarcía, Tui, Nigrán, Gondomar, Ponte Caldelas, O Grove, Cuntis, Fornelos, A Illa e Silleda
27 may 2019 . Actualizado ás 21:56 h.David Regades, secretario xeral do PSOE na provincia de Pontevedra, subliñou onte o alto valor que para a súa formación ten ter acadado once maiorías absolutas na provincia de Pontevedra, onde no mandato que agora conclúe só contaban con cinco alcaldes con oposicións reducidas.
«Son uns resultados extraordinarios, moi bos. Temos ao maior referente municipal do PSOE connosco ?por Abel Caballero? e acadamos maiorías absolutas de gran importancia e significación como en Vilagarcía, Ponte Caldelas, Cuntis, O Grove ou outras importantísimas e inéditas tamén como as de Tui, Nigrán e Gondomar», valoraba onte para La Voz de Galicia Regades.
Os socialistas terán tamén a mesma condición de maioría absoluta en Fornelos, A Illa e Silleda, ademais de Vigo. Foron tamén primeira forza en Vilaboa, Catoira, Caldas e Baiona, e segundo o secretario xeral provincial do partido están en disposición de acadar alcaldías ata agora vedadas como a da Cañiza, con Luis Piña á fronte tras empatar co PP. Será alí o único concelleiro de Cidadáns o que decida.
Esa situación de recorte de espazos co PP non leva con todo de momento a Regades a admitir como máis probable que o PSOE se lance a gobernar en solitario na Deputación de Pontevedra, onde contará con trece deputados de 27 posibles. «Falaremos con todos os partidos sen présas», concede , sen outorgar posibilidades nin á reedición do goberno de coalición nin a aventurarse en solitario con apoios puntuais do BNG.