Os apicultores da costa inauguran a campaña máis madrugadora da Indicación Mel de Galicia
24 may 2019 . Actualizado ás 09:32 h.Os apicultores galegos das Rías Baixas xa están a recoller mel. Trátase dun campaña «extraordinaria», constata o Consello Regulador da Indicación Xeográfica Protexida Mel de Galicia porque é a máis madrugadora desta denominación de calidade. A súa presidenta, Esther Ordóñez, alude ás boas expectativas coas que xa se traballa nas colmeas costeiras. «Ao non chover, as abellas si puideron aproveitar a boa floración e coller todo o néctar do eucalipto para transformalo en mel, non como o ano pasado, porque as obreiras non saen sen paraugas», indica a portavoz da IXP. Esta madruga é ademais importante para poder satisfacer a demanda. «Xa houbo envasadoras que non podían abastecer o seu mercado en decembro e outras máis grande aguantaron ata febreiro. Aínda hai algo de Mel de Galicia no mercado porque hai empresas que tiveron que deixar a clientes cos que levaban pouco tempo para asegurar o abastecemento das tendas coas que traballan dende sempre», confirma Ordóñez.
Os resultados do 2018 non foron tan produtivos por esas choivas de primavera que tamén afectaron á produción en froiteiras, «porque non houbo polinización suficiente». A demanda de Mel de Galicia sempre supera ofértaa pero, aínda que a produtividade non foi a desexada, a denominación certificou máis quilos, superando a barreira das 400 toneladas. As novas altas na denominación son as que explican que o crecemento se manteña a bo ritmo. «O Mel de Galicia é un produto á alza, que cada vez ten máis demanda. É a lambonada máis natural e saudable que existe, e o de Galicia é especialmente valioso polas súas propiedades», sinala Esther Ordóñez. A súa valoración está amparada nun estudo da Universidade de Vigo feito no campus de Ourense no que se cotejaron as táboas nutricionais de meles de todo o mundo. «O noso ten un poder antioxidante comparable co da froita. O galego ten máis vitaminas e minerais que os do resto do mundo», subliña a presidenta.
A fórmula lembra á icónica frase «E non esquezan supervitaminarse e mineralizarse» coa que Súper Rato se despedía a diario dos seus «amiguitos» na década dos oitenta e coa que a denominación fomenta desde o 2007 os almorzos saudables nos colexios. «Porque o mel é un alimento completo, para calquera dieta saudable. Non pode ter nada engadido porque senón xa non sería mel e hai estudos que avalan que dúas ou tres culleres ao día reforzan o sistema inmune», sinala a portavoz da Indicación Protexida, insistindo en que «é comparable coa froita en antioxidantes pero ademais ten minerais, vitaminas e propiedades antibacterianas».
Acoden habitualmente aos centros educativos para dar a coñecer a apicultura e esas propiedades energizantes das que xa parecía valerse Súper Rato. «Hai moitos nenos que nos din que non lles gusta, pero cambian en canto o proban. Tamén pasa nas catas en feiras, pero debemos falar de meles e non de mel, porque son moi distintos, xa que os da costa teñen un sabor máis doce e incluso ácido, mentres que os do interior teñen toques salgados ou mesmo amargos», manifesta Esther Ordóñez.
E os beneficios non só se gozan no padal. «Se tes unha queimadura e botas mel amais , non deixa que se faga bocha nin que se infecte e, ademais, axuda a que cure», afirma recordando que «os peregrinos máis antigos xa o levaban para o Camiño e facían con el ungüentos e mesturas con herbas medicinais. Non só é bo como alimento, senón para a cosmética ou para outros remedios caseiros e naturais».
O consumo mantense. «Incluso cando foi a crise, porque, aínda que non sexa un produto de primeira necesidade, tampouco é un alimento ao que se renuncie». Si soben tamén as exportacións, aínda que Galicia segue sendo o principal mercado do «lambonada natural máis natural e saudableseu ».
