Fútbol | Segunda B O Celta B levanta dous goles en contra nun partido tolo ante o Adarve cun dobrete de Ían Salvador e tantos de Bermejo e Apeh
22 abr 2019 . Actualizado ás 05:00 h.O Celta B tamén se apunta ás remontadas. Como o primeiro equipo ante o Vilarreal, onte foi capaz de levantar un 0-2 adverso para rematar converténdoo nun 4-2 que permite ver a permanencia ao virar a esquina. O marcador é o fiel reflexo dun partido instalado na tolemia, porque ao 13 minutos o Adarve xa mandaba por dous goles no marcador, aos 22 o filial empatara e nas segunda metade chegaron os dous goles que decantaron a balanza ante un rival que fai do caos táctico a súa razón de ser.
A tolemia en Barreiro comezou aos catro minutos cun penalti máis que dubidoso. Rai rexeitou un balón coa man pegada ao corpo e o árbitro sinalou os once metros. Berodia, que fora o autor do disparo, enganou a Iván Villar e marcou. Pouco despois, Garci o máis talentoso dos madrileños, aproveitou un rexeite para elevar o 0-2 no marcador, o que puña o partido, e a zona baixa, patas para arriba.
O mellor que lle puido pasar ao Celta B con semellante inicio é que dous minutos despois acurtou distancias ao rematar Bermejo no corazón da área un bo servizo de Sergio Carreira, que se asentou no lateral, desde a dereita. E tras outro remate de Bermejo e un aviso de Miñambres chegou o empate con outro penalti. Neste caso cunha derriba do porteiro Parra a Apeh que Ían Salvador, que actuara de asistente na xogada, transformou en gol.
A tolemia non cesou. O Adarve, camaleónico no táctico, non perdeu a cara ao partido e aínda que o Celta B tivo case todo o control se atopou con Parra ata en tres ocasiones: un cabezazo de Apeh, un remate de Pastrana e outro de Álex Serrano. Á contra, Garci meteu un par de sustos.
As mesmas revolucións
O segundo tempo non baixou as revolucións e seguiu instalado na histeria. Nada máis volver do vestiario Miñambres puxo en aprietos a Iván Villar pero do simulacro madrileño pasouse á estocada viguesa. O xuvenil Sergio Carreira, coa frialdade dun veterano, gañouse e correu a liña de fondo para servir un centro picado que Manolito Apeh converteu en gol cun cabezazo. O 3-2 obrigou ao Adarve a adiantar as liñas e á contra Ían Salvador marcou o gol da tarde e sentenciou o partido cunha vaselina sobre a saída de Parra tras roubar o balón e conducir a campo aberto.
O 4-2 era un cheque ao portador para os locais, pero o Adarve plantado cun 4-4-2 en rombo non cejó no seu empeño de meterse no partido. Fíxoo facer Adoghibe cun tiro ao pau e cun par de oportunidades que meteron o susto no corpo a un Celta B que se atopou con Parra nun par de contras que puideron redondear un partido tolo con final feliz para os célticos.
?Iván Villar; Sergio Carreira (Farrando, min 86), Ros, Robert Costa, Diego Alende; Bermejo, Rai, Álex Serrano, Víctor Pastrana; Ían Salvador (Solís, min 80) e Apeh (Dani Vega , min 72).
?
Parra, Mario (Escobar, min 69), Jordi, Richi, Juanma, Darío (Margallo, min 81), Garci (Adighibe, min 58), Anxo Auñón, Álvaro, Berodia e Miñambres.
Goles: 0-1, min 4: Berodia de penalti. 0-2, min 13: Garci. 1-2, min 16: Bermejo. 2-2, min 22: Ían Salvador de penalti. 3-2, min 49: Apeh de cabeza. 4-2, min 63: Ían Salvador.
Árbitro: Pérez Fernández (Castela-León). Amarelas a Iván Villar e Rai polos locais e aos visitantes Richi e Anxo Auñón.
Incidencias: Campo de Barreiro, boa entrada. Partido da trixésimo cuarta xornada.