Un dos fillos do falecido relata xunto ao veciño que atopou o cadáver do seu pai as circunstancias do crime
09 ene 2019 . Actualizado ás 11:31 h.Manuel Rivas é un dos cinco fillos do Manuel Rivas asasinado nos últimos días en Vigo. Cunha bolsa na cabeza, cos pés atados por un cinto e cuberto de trapos, plásticos e canas escondeuse o seu cadáver. Manuel, coñecido por Noli, tamén é veciño da zona, amigo da familia do defunto e a persoa que atopou o corpo ensanguentado deste veciño de Vigo de 81 anos.
«Isto non o fai un delincuente calquera. Fomos moitos veciños, eu cun sobriño. Buscamos polo río, pensei que caese por un camiño estreito, que lle dese un mareo. Pero non, pasamos ao lado e vimos algo raro. Tiña os pés atados cun cinto, a bolsa na cabeza e trapos, plásticos vellos e moitas canas cubrindo o corpo totalmente camuflado», explica Noli, cuxa casa está a 200 metros da vivenda do falecido. Alí, nun soar con dúas casas, residía este octoxenario. Na outra, un dos seus cinco fillos, tamén de nome Manuel, explica que «ao morrer mamá, que era o seu mastro, papá empeorou moito». A muller faleceu o pasado 1 de novembro tras unha longa enfermidade que, nos últimos tempos, soportou na casa doutra filla para estar mellor atendida.
«El perdeu a cabeza, ía con fajos de billetes, moitos, 10.000 ou 15.000 euros. En Nadal levoulle 15.000 a unha filla que llos gardase, dicía que ‘os bancos ían crebar'. Manuel admite que eses petos cargados de diñeiro en metálico non tardaron en darse a coñecer na zona, de aí, quizais, o ocorrido. «A xente sabíao, el sacábao e fardaba por aí de diñeiro. Sacaba fajotes, tacos, dicía que tiña noivas, dicía ‘vou xunto delas'. Pero iso, creo eu, era unha fantasmada, aínda que con tanto diñeiro nunca se sabe».
