Aplidin convértese no seu segundo medicamento contra o cancro no mercado, despois de Yondelis
11 dic 2018 . Actualizado ás 12:01 h.Pharmamar necesitaba recibir unha boa noticia máis que respirar e a recibida esta mañá xa está disparado o valor das súas deprimidas accións por amais do 11 %. Non é para menos, a compaña biotecnológica de orixe galega (e cunha das súas principais filiais, Zelnova-Zeltia, no Porriño) acaba de lograr a aprobación en Australia para Aplidin, o fármaco contra o cancro que permanece vetado polas autoridades sanitarias da UE, a pesar de ter superado con éxito os rigorosos ensaios clínicos.
A compaña que preside José María Fernández Sousa comunicou á Comisión Nacional del Mercado de Valores (CNMV), que a axencia reguladora australiana informou a Specialised Therapeutics Asia (STA) da aprobación deste medicamento para o tratamento de mieloma múltiple (en combinación con dexametasona), o que, segundo a farmacéutica, abre a porta a novos mercados para este medicamento en Sudáfrica , México, Canadá, Asia Pacífico, Oriente Medio e o norte de África. Xa que Pharmamar asinou un acordo de licenza con STA, establecida en Singapur , para comercializar Aplidin en Australia e Nova Zelandia en agosto do 2015, e, ademais, un novo acordo para outros 12 países asiáticos en febreiro do 2016.
Fontes de Pharmamar explicaron que esta aprobación, que consideran un novo fito no difícil mundo do desenvolvemento de medicamentos contra o cancro, «dános argumentos sólidos» para seguir defendendo a aprobación de Aplidin para o mercado europeo, pola vía do recurso presentado hai uns meses ante a Comisión Europea.
Aplidin convértese no segundo medicamento no mercado lanzado por Pharmamar, despois de que no ano 2009 conseguise a probación de Yondelis, un medicamento contra o sarcoma de tecidos brandos, que hoxe se comercializa en 90 países.