Á medalla conseguida en parellas sumou onte outra en individual sénior 2, tras quedar ás portas da final
19 novs 2018 . Actualizado ás 05:00 h.O vigués do club Tao Samuel Meilán foi o gran protagonista da expedición galega e española no Mundial de técnica e freestyle celebrado en Taipei ao conseguir dúas medallas de bronce.
Se o sábado lograba unha presea na categoría de parellas, onte facíao na categoría individual sénior 2. O deportista habíase quedado ás portas da final tras caer ante un filipino por só dúas centésimas.
O cansazo e algunhas molestias musculares pasaron factura a Samuel, que evitou a primeira rolda e na segunda eliminou a Italia. «Costoume un pouco porque tiña ou corpo entumecido, pero gañei», explicou á Federación Galega. En cuartos de final enfrontouse a un representante dos Estados Unidos e, ademais de vencer, notou mellores sensacións; e na semifinal cruzouse co filipino Ernesto Guzmán, campión do mundo no 2016, e que levaría a vitoria por só dúas centésimas. Un revés que non embaza a gran participación do vigués no Mundial, coas súas dúas medallas no peto.
Os outros participantes
En canto ao resto de representantes galegos, en freestyle individual sub-17, Celia García (Tao) conseguiu clasificarse para a final, na que concluíu sexta tras unha boa actuación.
O quinteto formado por Samuel Alves, Alejandro Losada, Manuel Rodríguez, Alicia Pérez e Laura Vázquez, integrantes todos do Tao, concluíu na oitava posición. Pola súa banda, a parella do Hebe (con Manu Paz e Bárbara Dei-Martino) foi décima. O mellor posto dos que non obtiveron podio foi para Gabriel Tembrás (Moodukwan) formando parte da parella de categoría júnior. Logrou a quinta posición tras sucumbir nos cuartos de final ante o equipo de Corea.