Minata Keita asinou fronte ao Arxil 24 puntos, 15 rebotes, unha asistencia e cinco roubos de balón
17 oct 2017 . Actualizado ás 05:00 h.Minata Keita volveu pola porta grande ao Celta Zorka. O equipo asina o seu mellor arranque nas seis tempadas que leva de desterro voluntario na Liga Feminina 2 con tres vitorias noutros tantos partidos e coliderato co Aros leonés e a nivel particular a cidadá de Mali xa se despachou cun MVP da xornada ao terceiro intento, ademais con 44 de valoración triturando os topes das semanas anteriores.
Porque Keita asinou no derbi co Arxil, un dos seus exequipos, un cartón que incluía 24 puntos, 15 rebotes, unha asistencia e cinco roubos de balón. A súa mellor actuación dentro dunha liña que lle leva a marcar diferenzas desde o principio cunha media de 18,3 puntos por partido con 59,5 % de acerto en tiros de campo e 11,7 rebotes por encontro. A súa valoración media queda cifrada nos 28 puntos.
Minta Keita (Bamako, Mali, 1989) vive a súa sexta tempada na Liga Feminina 2. Chegou a Cáceres en outubro do 2013, aínda que foi cortada tres meses despois. Logo viviu a súa primeira experiencia en Galicia, primeiro no Arxil e logo no Celta . No 2015 deu un xiro radical ao marcharse ao Cidade dos Adiantados da Lagoa para facer a viaxe de regreso a Galicia cunha primeira parada en Pontevedra e a segunda en Vigo.