Freire adiantou ao equipo lucense antes de que Bil anotase desde os once metros
30 nov 2025 . Actualizado á 21:38 h.A Sarriá e o Fabril empataron (1-1) o duelo de rivalidade de Segunda Federación disputado este domingo no campo da Ribela. O equipo lucense quedou a un paso de sumar o primeiro triunfo desde a chegada de Dani Giménez ao banco, pero un polémico penalti evitou finalmente que levase os tres puntos nun partido en que o filial deportivista marró numerosas ocasións de gol.
Freire adiantou ao conxunto local á media hora de xogo, pero Bil transformou o polémico penalti que estableceu a igualada final. O lance ocorreu ao fío do minuto 70, nunha xogada pola banda en que Iker Vidal chegou a liña de fondo. Polo seu centro rexeitado porfiaron Piay e Nájera, aínda que aquel despexou xusto antes de que o fabrilista impactase co seu pé e caese ao chan. O árbitro sinalou penalti, en cuxas queixas o adestrador local, Dani Giménez, viu o cartón vermello directo por, segundo recolleu a acta do partido, «protestar de forma ostensible unha das miñas decisións, de viva voz e cos brazos no alto. Unha vez expulsado entrou ao terreo de xogo varios metros, continuando coas protestas, tendo que ser suxeitado por varios membros do seu corpo técnico».
O empate serve á Sarriá para sumar 15 puntos, apenas tres máis que o Valladolid Promesas, en posto de eliminatoria de descenso. Pola súa banda, o Fabril, que apenas gañou unha das sete últimas xornadas, acada os 24 puntos e é terceiro clasificado, a catro puntos do liderado, pero xa con só dous de vantaxe sobre a sexta posición, a primeira fóra do play off de ascenso.
Ficha técnica
Sarriá: Embadje, Freire (William, min 59), Berardozzi, Levrand, Iago Parga, Da Silva, Edu (Iago Díaz, min 71), Piay, Douglas, Millán e David Vilán (Santi Gegunde, min 59).
Fabril: Hugo Ríos; Pablo García, Aarón Sánchez, Damián Canedo, Iker Vidal; Garrido (Manu Ferreiro, min 46), Dani Estévez; David Domínguez (Héctor Areosa, min 76), Nájera (Dipanda, min 82), Fabi (Cortés, min 82); e Bil.
Goles: 1-0, min 29: Freire. 1-1, min 70: Bil, de penalti.
Árbitro: Gómez Lameiro. Expulsou ao técnico local Dani Giménez (min 69). Amoestou aos locais Freire, Piay, Gegunde, Iago Parga e Embadje, así como aos fabrilistas Garrido e Dipanda.