O director de fútbol do Deportivo atendeu os medios durante a presentación de Arnau Comas e confirmou que busca «reforzar o central, o lateral esquerdo e a dianteira», así como «sería normal fichar a un mediocentro»
18 jul 2025 . Actualizado á 17:53 h.Unha vez foi presentado Arnau Comas como novo xogador do Deportivo, Fernando Soriano respondeu as preguntas que os medios lle formularon acerca do presente mercado de fichaxes e os diferentes movementos que este engloba.
«Viñeron Lucas e Arnau e hai previsión da chegada doutro central. Tamén temos que reforzar as posicións do lateral esquerdo e o dianteiro. Dependerá das saídas, aí veremos as incorporacións que faremos para completar o persoal», sinalou o director de fútbol acerca dos reforzos necesarios. Deixou ademais aberta a posibilidade da chegada dun mediocentro, xa que «sería normal acudir ao mercado».
Unha das pezas máis cobizadas é a do punta. «Se por min fóra, asinaríao hoxe, pero ao final en moitas situacións hai que agardar. Non só inflúen o Dépor e o xogador, senón tamén outros clubs», sostivo, antes de recalcar que «hai varias opcións. O perfil que se busca dependerá de quen continúe no persoal. Ao míster gústalle un dianteiro con mobilidade e que teña ruptura, polo que será unha cualidade que buscaremos».
No apartado das baixas, apuntou que descoñece exactamente cantas se van a producir, xa que «hai xogadores que o adestrador aínda non coñece ben, así que ata o 2 de setembro todo é posible». Neste grupo de incógnitas do que fala se atopan Charlie Patiño, Denis Genreau ou Luis Chacón, de quen afirmou que «vén de facer unha gran tempada e estamos moi contentos con el. O míster está a coñecelo e agora mesmo é unha opción moi real para continuar connosco».
Ao ser cuestionado polo cambio económico desde a pasada tempada, Soriano asegurou que «o límite salarial varía día a día, aínda que é certo que nós temos algo moi importante, e é que a nosa masa social é incrible. Iso axúdate a afrontar segundo que posicións. O que máis varía no noso escenario é se hai unha venda dun xogador, como podería ser a de Yeremay. Ao non realizar ningunha, o nivel estará como o ano pasado, quizais un pouco mellor».
En canto ás relacións co Penafiel portugués, Fernando Soriano comentou que «a sinerxía será moi importante. Está claro que as decisións se tomarán en colaboración con xente nosa. Agora poderemos ver a liga portuguesa in situ porque imos competir nela. O desenvolvemento de xogadores e a complementación entre os dous clubs pode ser importante». Sobre os movementos levados a cabo entre ambos, aclarou que «é importante diferenciar. Traspasos podes facer os que queiras, pero cesións só son tres. Agora mesmo van dous traspasos, pero cremos que pode haber algunha situación máis».