No fútbol hai tópicos igual de antigos que o propio deporte. O primeiro é o seguinte: cando ganas un partido fronte a un rival directo, lévasche seis puntos na clasificación. A resultada fronte ao Raio Majadahonda representa á perfección isto. De ter perdido, os dous equipos atoparíanse empatados a puntos, en cambio, o Dépor avantaxa en 6 ao club madrileño a día de hoxe.
Outro pensamento recorrente neste tipo de partidos é que é máis doado gañar como local que como visitante. Aínda que realmente, máis que un tópico, esta é unha realidade demostrada cientificamente. A vantaxe como local existe. Aproximadamente o 50% dos partidos gáñanos os equipos que xogan en casa. Por que? Un dos motivos é a afección local, que exerce a súa influencia sobre os xogadores e o árbitro. Pero existen máis factores. Se non, cos estadios baleiros pola pandemia esta vantaxe desaparecese, e non foi así. Polo tanto, o feito de obter unha vitoria fóra de casa aumentou o valor do resultado en Majadahonda.
Sigamos tirando de vellos proverbios: os partidos entre equipos igualados adóitanse decidir ao final. Isto tamén é certo. A maior parte dos goles métense na segunda parte. Máis concretamente, na última media hora. Por iso o que o Dépor conseguiu é meritorio: ser visitante (sen esquecer o gran número de deportivistas presentes) e adiantarse no minuto 2.
Para rematar, a estraña situación vivida a semana anterior fronte ao Estremadura era un hándicap. A incomparecencia en Riazor desvirtúa a competición, como dixo hai días Cristóbal Parralo. É certo que o Dépor levou 3 puntos dun partido que non tivo que xogar, pero, entre os que nos dedicamos ao fútbol, predomina a idea de que descansar unha fin de semana pode facer que o equipo perda o ritmo de competición. Máis mérito ten entón entrar a un partido de enorme transcendencia como o Dépor o fixo nel Cerro do Espino.
Estes factores facían que o Raio Majadahonda?Dépor fose un reto para os coruñeses. Se son sincero, a imaxe que os visitantes mostraron durante os primeiros minutos de xogo (e durante todo o partido) resultoume sorprendente. Non agardaba un partido con tanta solvencia. Aínda que, bo, isto é o Dépor. E este equipo pode, e debe, acostumar á súa afección a este tipo de partidos.
Iyán Baragaño é membro do grupo de investigación AGR da UDC