O factor casa crece co aumento de público en Riazor de cara ao primeiro duelo transcendental na segunda fase
18 abr 2021 . Actualizado ás 05:00 h.O mal menor ten outro nome en Soria. «Algo minimamente satisfactorio unha vez que non puidemos optar ao ascenso de categoría». Así define Álex Huerta , adestrador do Numancia, aquilo que Rubén da Barreira ve como un castigo atenuado: estrear en agosto a Primeira Federación. Distintas formas de cualificar o novo obxectivo de dous conxuntos construídos para o retorno inmediato a Segunda e que pelexarán en Riazor por non deixarse moitas opcións de consolo. Branquiazuis e rojillos disputaranse un liderado do que os apartou o Racing de Ferrol e que ten enxunlla máis aló do crédito que dá ir primeiro a tres xornadas de que conclúa a fase definitiva.
Un triunfo local poría ao Deportivo catro puntos por diante do adversario, que aínda debe visitar A Malata. Os coruñeses terían na súa man evitarse outro peche de tempada a cara de can, liquidando a clasificación antes de viaxar aos Paxariños. Aos sorianos móvelles manter a pelexa aberta ata o último día e contan co factor extra da dinámica.
Enlazan tres vitorias, cunha bagaxe de dez goles a favor e dous en contra. Ademais, non coñecen a derrota a domicilio desde que o actual técnico ocupa o banco. Tampouco teñen baixas importantes, unha vez que Manzanara superou o coronavirus. O centrocampista non estivo para recibir ao Racing e tampouco puido completar a semana de adestramentos, pero Huerta aclarou que se atopa «en disposición de xogar». Tamén avanzou o adestrador que probablemente fará algún cambio» respecto ao once que derrotou (3-1) aos ferroláns o domingo pasado e a lista de opcións non é ampla.
O lateral Borja San Emeterio é a ausencia máis rechamante do Numancia na lista de 19, polo que Lillo conservará a súa praza e o resto da zaga é practicamente inamovible. Con Asier Benito en refacho arriba (catro goles consecutivos) as posibles novidades quedarían restrinxidas ao dobre pivote ou aos extremos, onde José Fran apunta a alternativa.
Máis amplo parece o abano de Rubén da Barreira. Non só porque teña incluído un xogador máis que o opoñente na súa convocatoria, citando aos mesmos 20 que viaxaron a Langreo, senón porque os ensaios de Abegondo e Riazor mesturaron aos intocables con varios dos menos habituais. Valín, Gandoy, Nacho e Beavue han ir tendo minutos de proba dentro dun once con opcións de ser o bo, aínda que a novidade máis repetida foi a de Borges. O tico aspira ao lugar de Uche mentres que a praza máis aberta é a de extremo esquerdo. Rayco non brillou en Ganzábal e tanto Raí como Lara acumulan crédito polas súas actuacións recentes. En calquera caso, o técnico quixo restar peso a posibles cambios, desvinculándoos da recente derrota: «Non me podo deixar contaminar por un último resultado».
E se o visitante conta coa baza do ánimo, ao anfitrión ampáralle a das mil gargantas. O dobre de público en Riazor para esta enésima final anticipada. «É un partido importante, iso é indiscutible —admitía o míster—. Afrontámolo coa ambición de dar un paso á fronte e poder selar o obxectivo canto antes». Mañá é tarde.