Téñoo moi claro: non se debe utilizar a canteira como escudo de nada. E, se se quere apostar por ela, que sexa con todas as consecuencias. E estas incumben a todos: o club, os técnicos, os futbolistas e ata a afección. Todos deben entender que o proceso da canteira é máis lento, pero moito máis satisfactorio.
Require ter moi claro que se quere facer e tamén explicalo moi ben, porque os froitos non son inmediatos e todos debemos ser conscientes. O primeiro paso debería ser profesionalizar o fútbol base. É necesario atraer aos mellores técnicos, que estean ben remunerados e co obxectivo claro de traballar para facer mellores aos futbolistas en todos os aspectos: tácticamente, tecnicamente e cunha filosofía ou unha idea clara, sexa a que sexa, pero enfocados a dotar ao xogador de todo o que necesita para ter posibilidades reais de chegar ao primeiro equipo.
Insisto en que é fundamental profesionalizar de arriba abaixo a canteira. E non é só unha cuestión de diñeiro. Se cadra necesítase menos investimento que a que precisan moitas fichaxes que logo non renderon. Ademais, como se pode comparar unha cousa con outra? A canteira require paciencia e crer realmente nela. Porque Villares e Rayco non son estritamente canteira. Son froito da captación. Un canteirán é un mozo que se formou desde cadetes ou xuvenís, e ha ir formándose ata o primeiro equipo.
O exemplo a seguir é o Celta ? En primeiro lugar hai que saber de que dispón o Deportivo, e investir. É o momento adecuado. Sería máis bonito co primeiro equipo en Primeira División, pero non vexo ningunha molestia que impida subir xogadores a Segunda B. Si hai unha vantaxe: só existe unha categoría de diferenza entre o Deportivo e o Fabril. Se as distancias non son agora máis curtas que nunca, cando o van ser?