Peru pide desculpas: «É un vídeo persoal, dirixido aos meus amigos e gravado fai unha semana»
TORRE DE MARATHÓN
O futbolista do Deportivo emitiu un comunicado no que pide perdón aos seus compañeiros, á afección, ao Deportivo e ao Athletic Club
02 dic 2019 . Actualizado ás 21:45 h.O futbolista do Deportivo, Peru Nolaskoain, quixo dar a cara e desculparse tras a publicación dun vídeo privado da súa conta en Instagram no falaba do Deportivo e no que afirmaba que «non lle gañamos un partido nin á ONCE, é incrible o malos que somos». O vasco emitiu un comunicado a través das súas redes sociais no que pediu desculpas «aos meus compañeiros, a quen xa llas trasladei persoalmente. Seguirei traballando duro xunto a eles, como cada día para reverter esta situación», asegura. Tamén quixo desculparse coa afección: «Nese momento de bajón, as miñas palabras e o seu ton, que poden comprender quen de verdade me coñecen e saben o que sinto e como o expreso, non son xustificables antes quen están a sufrir, como eu, pola situación que vive o equipo».
Tamén ao Deportivo «pola oportunidade de seguir crecendo profesionalmente» e ao Athletic Club porque «fallei nun comportamento que non volverá repetirse nun futuro».
O vídeo do centrocampista viu a luz onte e nel, recoñecía nun ton distendido o horrible refacho do equipo: «Cheguei á conclusión de que estou fodido. Teño un trancazo de tolos, que non sei de onde vén, e non gañamos un partido nin á ONCE. É incrible o malos que somos. Preocupante de verdade».
O futbolista, que chegou a o Deportivo esta tempada en préstamo por parte do Athletic de Bilbao, é titular indiscutible desde a súa chegada, primeiro con Anquela e agora tamén desde a chegada de Luis César. Peru insiste no vídeo recolleito das súas redes sociais: «E, á parte, non saio de festa... Saír de festa para emborracharme e para esquecer a puta merda de ano que estou a facer e estamos a facer. Non, non. quedo en casa facendo o subnormal».
Esta mañá, o seu compañeiro Borja Vale, saíu no seu defensa ao afirmar que «é un mozo que traballa ao cento por cento, que é un cacho de pan. É o claro exemplo de que non somos máquinas, de que nos imos a casa e estamos fodidos e expresamos aos nosos seres queridos ou aos que creemos os nosos amigos como estamos. Temos sentimentos. Isto saíu e seguramente moitos teñan ese pensamento, o que pasa é que non sae. É certo que nesta situación non axuda, pero creo que é o exemplo de que non somos máquinas, que compartimos cos seres queridos os nosos pensamentos, a situación que hai, que estás fodido», dixo o berciano na rolda de prensa posterior ao adestramento.
