Os responsables do fútbol xaponés están a traballar ben. Houbo un cambio importante hai uns anos cando os equipos empezaron a cobrar polas retransmisións dos partidos. Así, os clubs viron crecer os seus ingresos de xeito moi importante. Melloraron os persoais e poden fichar a mellores estranxeiros. A competición está a crecer moito. Tradicionalmente sempre houbo moitos brasileiros, pero empezaron a vir españois hai pouco e a chegada de Iniesta, Fernando Torres ou David Villa levantou moita expectación. Tamén en canto ao interese que esperta a Liga española. Nos partidos importantes véndense todas as entradas e as televisións están máis interesadas.
Tamén se modificaron as regras e pasaron de estar permitidos tres estranxeiros e un asiático que non sexa xaponés, a cinco estranxeiros. Todo está a evolucionar moi rápido. Os xaponeses son moi estudiosos, os adestradores viaxan a Europa a aprender e a federación, ademais, axúdalles moito. Existe unha liga universitaria moi forte, con dúas categorías, nas que os seus xogadores non teñen que pagarse os estudos, que aquí son moi caros. Todos os anos saen bos futbolistas que acaban en Primeira ou Segunda e moitos son titulares de equipos importantes. A J1 é a mellor liga de Asia, a máis forte. Leva varios anos gañando a Champions asiática. Entre os titulares da selección hai moitos xogando en Italia, Inglaterra ou Alemaña. E na Segunda xaponesa hai moitos que poderían dar o salto a España, pero o problema para que máis dean o salto é que aquí están moi ben pagos.