Sigo pensando, e díxoo o propio Jagoba Arrasate antes do partido do sábado, que o Dépor dispón do mellor persoal da categoría. Con todo, cando veñen mal dadas, está a saír a relucir o tipo de xogador que non é capaz de dar o rendemento agardado por culpa da inquedanza. Este é o principal motivo do baixo rendemento de todo o persoal, porque é difícil atopar agora mesmo a un só deportivista ao seu nivel habitual. Todos están por baixo do que poden dar, así que, mentres agardamos que o equipo teña tocado fondo e tome a senda da remontada, calquera circunstancia revélase capaz de afundilo.
Na última xornada, tras uns bos minutos iniciais, calquera circunstancia anómala afecta máis do que debería, porque todo está cosido con fíos. E a sensación que queda despois é de impotencia, de non poder dobregar a un rival ao que lle abondou con estar ben situado e saír ao contragolpe.
A defensa é a liña máis afectada pola crise, sobre todo na parcela central. Na primeira volta todos temiamos que o mercado de inverno afectase á parella de centrais, pero a día de hoxe, ninguén ve ese perigo, porque é a parcela que máis está a sufrir. Está a xerarse a mesma sensación de inseguridade que o ano pasado afectaba á portería. Agora mesmo a defensa, salvo pola dereita con Bóveda, tanto na parcela central, sobre todo Duarte, como na esquerda Cabalo, que defensivamente sempre ha cojeado máis, non dan sensación de fortaleza defensiva.
Un resultado pódeo cambiar todo, así que o domingo hai que gañar polo civil e o criminal. É dicir, non importa o como, senón sumar tres puntos para regresar á pelexa. Se, ademas, o Dépor recupera sensacións, mellor, pero reencontrarse xa coa vitoria é a primeira pedra sobre a que crer.