Tino Fernández: «A pesar da gran débeda, a viabilidade do Deportivo está garantida»
TORRE DE MARATHÓN
O presidente entregou onte á noite as insignias de prata aos socios que este ano cumpriron 25 anos de fidelidade ao club
17 oct 2018 . Actualizado ás 16:13 h.O presidente do Deportivo, Tino Fernández, asegurou este martes aos abonados que este ano cumpriron 25 como socios do club que, «a pesar da gran débeda» que xerou a entidade branquiazul e ao feito de ter descendido a Segunda, «a viabilidade está garantida».
«A estabilidade e viabilidade económica, a pesar da gran débeda que hai que seguir afrontando, está garantida. Iso permítenos seguir abordando proxectos fundamentais para o Dépor dos próximos 25 anos», explicou o dirixente no seu discurso.
Fernández subliñou que «a realidade económica do fútbol actual» implica ter «moi claras as regras do xogo» e saber «ata onde» pode chegar «a todos os niveis» cada club.
«A partir de aí, hai que xogar coa variabilidade que dan o deporte e o fútbol, para romper moldes e dar pasos máis aló do que a priori se nos supón», sostivo.
Engadiu que a estrutura que creou desde a súa chegada ao Deportivo conseguiu que a entidade «apenas se resinta» con «vicisitudes como o último descenso», aínda que admitiu que si houbo que «facer axustes» por estar na categoría de prata, aínda que estes «non comprometen proxectos importantes para o futuro».
Fernández mostrouse seguro de que na parte deportiva o conxunto branquiazul volverá estar onde lle corresponde ».
«Podedes estar seguros de que ningún dos que formamos parte do Dépor regatearemos un chisco de esforzo para sacar este proxecto adiante. E á ilusión que temos cada un de nós únese a que nos contaxiades vós», díxolles aos máis de 700 abonados aos que o club entregou unha insignia de prata.