Nun partido espeso por parte de ambos os contendentes, foron os de casa quen máis afortunados estiveron de cara a porta
07 oct 2018 . Actualizado ás 21:38 h.Un solitario tanto de Jonathan no minuto 65 foi suficiente para tombar ao Deportivo Fabril na súa visita a Guijuelo (1-0). Nun partido espeso por parte de ambos os contendentes, foron os de casa quen máis afortunados estiveron de cara a porta para sumar o seu cuarto triunfo seguido. Os de Tito Ramallo ven freada en seco a súa progresión nun duelo no que incomodou ao seu rival en moitas fases pero no que lle faltou a faísca para superar o marco contrario.
Afrontaba o envite o filial deportivista en terras castellanoleonesas con optimismo moderado tras conseguir a primeira vitoria da tempada na última xornada, tres puntos ante o Salmantino que souberon a gloria e que lle serviron para escalar na táboa e, sobre todo, insuflar unha dose de confianza de cara ao choque ante os chacineros. Un rival de doce, que encadeaba tres triunfos seguidos, e que non cedera ningún punto no seu feudo.
O plan trazado por Tito Ramallo parecía claro: cometer o menor número de erros en defensa, manter a organización en defensa e tratar de saír á contra para sorprender un Guijuelo que tampouco se atopou cómodo e foi incapaz de facer fluír o balón. A posesión, ao termo dos primeiros 45 minutos, foi lixeiramente (53%) favorable aos coruñeses, que no entanto tampouco puxeron en moitos aprietos aos locais.
Foi un primeiro acto bastante decepcionante no que en ningún momento se desataron as hostilidades e no que o respecto comandou en todo momento. Con todo, houbo algunha que outra ocasión digna de mención, como a que tivo nada máis comezar o Guijuelo e que auguraba un partido, cando menos, divertido. Juanra, tras un pase atrás de Manu Fuster, puxo a proba os reflexos dun atento Pedro López que mandou o coiro a córner.
Desde ese momento ata a seguinte acción de perigo transcorreron preto de 20 minutos. Nese lapso, o cadro fabrilista seguía ao seu, sen conseguir ganduxar xogadas claras para inaugurar o marcador pero sen sentirse tampouco incómodo. No minuto 19, May non acertou a rematar correctamente unha boa xogada por banda. A réplica chegou no 21 cun centro de Manu Dimas que Pepe Carmona, incomprensiblemente, mandou ao limbo.
Parecía que se animaba o choque, pero nada máis lonxe da realidade. Seguiron ambas as escuadras polos mesmos camiños, sen présas, con paciencia, e provocando no espectador un inevitable bostezo. Rematou con empate a cero unha primeira metade na que se botou de menos máis ambición por parte dun e doutro, pero o certo é que o resultado non desagradaba a Tito Ramallo e os seus, que se marcharon aos vestiarios coa portería a cero e as opcións de triunfo intactas.
A segunda metade trouxo consigo similares camiños, aínda que talvez foi o Guijuelo quen, esporeado polos seus, tratou de achegarse máis á área coruñesa. Así, no minuto 48 Dimas plantouse só ante Pedro López, que se impuxo no man a man co xogador guijuelense. No 60 foi outra vez o equipo de Anxo Sánchez o que buscou o primeiro da tarde cun centro de Raúl desde o flanco dereito ao que non chegou Carmona.
O Fabril non atopaba o xeito de combinar e unicamente nalgunha acción illada de May ou en balóns longos que non atopaban destinatario, baseábase o seu ataque. Os verdes apertaron o acelerador e aumentaron a súa presenza na zona de castigo galega. Manu Fuster, cun disparo da frontal, volveu avisar. E así, ata que no 65' lograron desarbolar definitivamente a retagarda do filial, ao que lle tocou entón remar contracorriente.
Chegou o tanto chacinero na segunda xogada dun córner na que Razvan puxo o coiro no segundo pau e aí rematou de cabeza Jonathan para superar un Pedro López que nada puido facer. O conxunto branquiazul entón buscou rapidamente a réplica mediante un disparo que se marchou por amais do traveseiro de Joni Montiel e, pouco despois, cun novo croque de May ao que non logrou dar a dirección desexada.
O Guijuelo acariñou o segundo tras unha boa xogada de Ayub e Uxio, que acababa de entrar, non puido rematar ben unha falta frontal no 78'. Igualáronse as forzas e o Fabril buscou ata o final, con máis corazón que cabeza, igualar a contenda nalgún que outro descoido dos de casa. Ao final, non houbo tempo para máis e o filial deportivista regresou á senda da derrota ante un rival que soubo sacar petróleo nun trabado envite.
O sábado (17 horas), o Fabril recibe en Abegondo ao Unión Adarve, no primeiro dos dous duelos consecutivos como locais que deben afrontar.
Ficha do partido
CD Guijuelo: Felipe Ramos; Raúl Ruiz, Jonathan, Jesús Muñoz (Ayub, 47´), Razvan; Carlos Rubén, Julián Luque, Juanra; Carmona (Iván Pérez, 76´), Manu Dimas (Pablo Pallarés, 83´), Manu Fuster.
RC Deportivo Fabril: Pedro López; Blas, Quique, Mujaid, One; Carlos López, Víctor, Javi Cobo (Uxio, 76´), Juanje (Villares , 66´); May (Luismi, 82´), Joni Montiel.
GOLES: 1-0 (65´) Jonathan.
ÁRBITRO: Cambronero Gonzalez (Castellano -Manchego). Cartóns amarelos aos locais Julián Luque, Carlos Rubén e Razvan; e aos visitantes Blas e Carlos López.
CAMPO: Municipal de Guijuelo, uns 600 espectadores