O vigués de 34 anos acaba contrato co Betis e o Dépor ofreceulle un contrato de dous anos
20 may 2018 . Actualizado ás 22:42 h.O Deportivo está interesado na contratación de Dani Giménez para defender a portería en Segunda División. O porteiro vigués, de 34 anos, acaba contrato co Betis e a entidade branquiazul xa lle fixo chegar unha proposta de dous anos de duración.
Segundo algunhas fontes, o futbolista vería con bos ollos a oferta branquiazul, pero non ten decidido aínda o seu futuro. Está á espera de ver que pasa no seu actual club coa chegada de Pau López, se implica a saída de Adán, nese caso podería ter oportunidade de ampliar o seu contrato. Ademais, algún club de Primeira División tamén mostrou certo interese por contratalo, polo que aínda non hai nada pechado.
A posible incorporación de Dani Giménez é unha das primeiras negociacións que asumiu Carmelo do Pozo desde que hai dúas semanas foi presentado como novo director deportivo da entidade branquiazul.
A portería é unha demarcación que preocupa moito na praza de Pontevedra despois de que este ano teñan desfilado ata cinco xogadores baixo os paus do primeiro equipo cun resultado, salvo Francis, de suspenso. De todos, o nixeriano e Tyton son os únicos que quedan con contrato, aínda que no caso do polaco parece probable que o rescindirá.