A Audiencia apoia a incorporación dos informes de Facenda á causa contra Lendoiro

A Audiencia Provincial da Coruña volveu a desestimar un recurso presentado por Lendoiro, neste caso en forma de adhesión a un escrito cursado por Germán Rodríguez Cunchado, no que insistía ante o alto tribunal na que non se aceptase a información enviada por Facenda e que deixaba de manifesto as enormes diferenzas entre a débeda real do Deportivo e a declarada por Lendoiro entre os anos 2007 e 2011. Neste caso, e tras rexeitar con anterioridade outros recursos de ambos os investigados, a Audiencia entende que, ademais de ser procedente a petición do fiscal (xa o dixo con anterioridade), non está fóra de prazo porque se trata de aclaracións á solicitude inicial, non novas probas.

Esta resolución chega a piques de pecharse a instrución da causa aberta contra o expresidente e contra o exabogado do Deportivo por supostos delitos societarios durante o mandato do primeiro no club corués. Lendoiro tratou de evitar desde o primeiro momento que o informe da Axencia Tributaria tivese validez, alegando unha serie de circunstancias que primeiro a xuíza de Instrución número 3 da Coruña, Margarita de Ron Cambón, e posteriormente a Audiencia han ir desestimando.

E é que os sucesivos informes remitidos por Facenda han ir pondo de manifesto que, nalgúns anos, a diferenza entre o declarado e o real acadou os cincuenta millóns de euros, o que segundo algúns expertos consultados por La Voz de Galicia, fai prever que en breve podería anunciarse que Lendoiro terá que sentarse no banco dos acusados para responder destas acusacións.

---

---

---