Seedorf integra un corpo técnico de 18 persoas. Elixe a Rubén como porteiro despois da tempada que leva. Koval, a fichaxe de xaneiro, viaxa a Xetafe como premio e non entra na convocatoria. Juanfran é fixo. Luisinho loce onte como o xogador que máis remata. Krohn-Dehli, en teoría a mellor incorporación do inverno, perde balóns na frontal. Muntari xoga como titular a pesar do seu sobrepeso. Os mediapuntas son Mosquera primeiro e Borges despois, con Çolak e Cartabia no banco e Carles Gil na súa casa da Coruña. Os once Andones de hai uns días convértense en cero na aliñación do Coliseo Alfonso Pérez. O romanés pregunta, no momento de saltar ao campo, onde se coloca. Adrián segue como capitán no terreo de xogo, rango do que se decatou ao ver o seu nome apuntado nunha lousa hai dúas semanas. Lucas, o día que xoga de nove, apenas pisa área. Borges ve pasar o balón dun lado a outro sen poder tocalo. As rotacións acadan xa varias liñas, pero Sidnei nin se estreou co novo adestrador. O último gol do Deportivo chegou hai 500 minutos, aínda que o Xetafe lle meteu tres. O equipo lembra que o arreón ante o Espanyol non foi máis que iso. Por moito que se empeñen os seus rivais en facer que pareza posible a permanencia, o Dépor vai directo a Segunda.