O xogador arxentino asegura que «todo saíu moi ben» en instagram
13 dic 2017 . Actualizado ás 13:56 h.O centrocampista arxentino do RC Deportivo Fede Cartabia foi intervido en Portugal dunha pubalxia e explicou nas súas redes sociais que «todo saíu moi ben». Cartabia, segundo explicou o club galego, pasou polo quirófano a última hora da tarde deste luns para ser operado da 'hernia de futbolista' que presentaba. A intervención foi realizada no Hospital CUF de Porto polo doutor Magalhaes, que en setembro operou ao seu compañeiro de equipo Carles Gil doutra pubalxia, e «transcorreu satisfactoriamente», apunta o Deportivo.
«Todo saíu moi ben grazas a deus. Agora a recuperar e volver máis forte que antes», escribiu o propio xogador nas súas redes sociais. O futbolista pasou a noite no centro hospitalario e este martes hase desprazado a Galicia para iniciar o postoperatorio e a recuperación. Superada a cirurxía, informa o Deportivo, Cartabia levará a cabo o programa de fisioterapia e readaptación progresiva necesario para a súa completa reincorporación ás esixencias do fútbol profesional.
O club non concreta os prazos previstos para a súa recuperación, que será duns dous meses, polo que non volverá competir, como mínimo, ata febreiro e perderase, entre outros, os partidos ante o FC Barcelona o vindeiro domingo e o RC Celta o día 23. Ata a súa lesión, Cartabia era o único futbolista do Deportivo que fora titular en todos os encontros de LaLiga Santander, na que, ademais, estaba a ser un dos máis destacados do conxunto coruñés.