Con Pantilimon outra vez cuestionado, a reaparición do porteiro galego do Dépor na Rosaleda, xa recuperado clinicamente, dependerá do grao de dor que arrastre nas próximas semanas
08 novs 2017 . Actualizado ás 18:04 h.Cada gol que encaixa o Deportivo, a mente dos afeccionados branquiazuis viaxa ata Coristanco, marcados polo seu desexo de ver, de novo, a Rubén Martínez baixo os paus da portería branquiazul.
A inseguridade transmitida por Tyton e Pantilimon nestas primeiras xornadas de Liga fai que o meta galego sexa o desexado pola inchada branquiazul, que podería ver colmado o seu desexo no próximo encontro de Liga , que disputará o Deportivo na Rosaleda o domingo 19 de novembro ás doce do mediodía.
A día de hoxe, o cérbero coruñés está clinicamente recuperado da lesión que sufriu no ligamento do dedo pulgar da súa man dereita. Tras as últimas probas médicas realizadas, comprobouse que a cicatrización está a ser perfecta polo que só quedaría agardar como responde o meta á hora de atallar balóns.
Das sensacións de Rubén, da dor que teña e da capacidade de aguante do mesmo que presente dependerá que Cristóbal decida convocalo de cara a este importante duelo fronte a un rival directo na loita pola permanencia.
A intención dos corpos técnico e médico do Deportivo é que o meta se vaia incorporando paulatinamente ao traballo de grupo durante esta semana e xa a próxima analizar como responde aos potentes disparos dos seus compañeiros.
Durante a pasada semana xa foi facendo diferentes exercicios co grupo e, mesmo, disputado algún partido en campo reducido. Con todo, cando el estaba baixo os paus, o conxunto rival tiña a orde de non disparar desde moi preto, para que o aínda convalecente Rubén non sufrise demasiado atallando os chuts.
A partir desta semana, xa se irá incrementando o grao de integración e a próxima, se todo transcorre de acordo ao previsto, sería o momento de obter a alta médica e pórse a disposición de Cristóbal para Málaga.
Adrián, tamén
A de Rubén agárdase que non sexa a única novidade que presente a convocatoria do técnico branquiazul para viaxar a Málaga. Adrián López podería regresar tamén á lista, tendo en conta que progresa adecuadamente dos seus problemas físicos e está previsto que esta semana traballe ao ritmo dos seus compañeiros.
A semana próxima, sempre contando con que non xurda ningún imprevisto, o futbolista asturiano recibirá a alta médica.
Algo máis terá que agardar Carles Gil, aínda que no club son optimistas con que rebaixe os prazos previstos e poida volver xogar antes de que finalice este ano natural.