Movido polo seu talento artístico e amor polo océano e as súas criaturas, Hillenburg lanzouse a escribir e ilustrar historias como ferramentas de ensino
27 novs 2018 . Actualizado ás 20:36 h.O creador de Bob Esponxa, Stephen Hillenburg, faleceu este luns aos 57 anos de idade por mor da esclerose lateral amiotrófica (ELA) que padecía, segundo confirmou a canle de televisión Nickelodeon.
Nacido o 21 de agosto de 1961 en Fort Sill (Oklahoma, Hillenburg foi profesor de bioloxía mariña antes de dedicarse de cheo á animación. Movido polo seu talento artístico e amor polo océano e as súas criaturas, Hillenburg lanzouse a escribir e ilustrar historias como ferramentas de ensino con personaxes que máis tarde se converterían nos habitantes de Fondo de Bikini, a casa de Bob Esponxa.
Desde Nickelodeon quixeron resaltar o traballo de Hillenburg ao crear ao personaxe, ao que dotou cun «sentido único do humor e unha inocencia que divertiu a xeracións de nenos e de familias en todas partes». «Os seus personaxes, completamente orixinais, e o mundo do 'Fondo do mar' permanecerán como un recordo do valor do optimismo, a amizade e os ilimitados poderes da imaxinación», asegura a cadea. Aínda que estaba destinada ao público infantil, Bob Esponxa tamén conseguiu atraer a numerosos espectadores adultos.
Nickelodeon, que facturou máis de 13.000 millóns de dólares (11.456 millóns de euros) en mercadotecnia relacionada con Bob Esponxa, recalcou que Hillenburg, ao que lle foi diagnosticada a enfermidade en marzo do ano pasado, deu á popular serie «un sentido de humor único e unha inocencia que achegou felicidade a xeracións de nenos e familias en todas partes». En España, Nickelodeon celebrou este 2018 o 18 aniversario da chegada da coñecida esponxa submarina ás televisións cunha programación especial na que se emitiron algúns dos seus episodios máis emblemáticos.