A «app» para «smart tv» con tecnoloxía Android está desenvolvida en colaboración con R
22 jul 2018 . Actualizado ás 05:00 h.O espectador pode nadar cunha manda de centos de golfiños fronte ás costas de Galicia, percorrer o pórtico da Gloria despois da súa incrible restauración ou saber que tempo fará a fin# de semana en cada unha das provincias galegas. Pode facelo grazas a un vídeo. Estes son só algúns exemplos da oferta audiovisual dos últimos días na web de La Voz de Galicia. Con 136 anos de historia e inmersa nun continuo proceso de transformación dixital, busca estar presente cada día nas plataformas onde están os seus lectores. Por iso, desde hai anos, o vídeo hase convertido nunha parte importante da súa aposta informativa. Ata agora se podían ver na web e en redes sociais (cunha ampla oferta de conexións en directo realizadas a través de plataformas como Facebook ou YouTube), pero desde esta semana tamén dan o salto ao televisor.
Esa é a razón pola que naceu a nova aplicación de Android TV de La Voz, desenvolvida en colaboración coa compaña de telecomunicacións R, e que permite acceder de forma sinxela a decenas de novos vídeos cada día. O espectador poderá ver as noticias máis importantes da xornada, pero enfocadas sempre desde unha óptica galega. Non deixarán de lado tampouco todo o que sucede na contorna máis próxima ao lector, ademais de ofrecer programas especiais con acento propio. Exemplos son os especiais do Mundial de Rusia, o despregamento multimedia no Camiño de Santiago ou á declaración en directo do maquinista de Angrois na comisión de investigación no Congreso dos Deputados.
Televisión e Internet
Esta nova aplicación estará dispoñible nos televisores intelixentes con tecnoloxía Android TV e tamén a través do deco 4K de R. Este pequeno aparello, con forma de cilindro e ao que a compaña de orixe galega quixo comparar cun pequeno canón, é capaz de converter o noso televisor en intelixente só cunha conexión HDMI. Así se reúnen nun mesmo aparello as canles de televisión máis interesantes co mellor de Internet. O deco 4K permite tamén aos clientes que así o contraten combinar a televisión xeneralista con novas plataformas de vídeo baixo demanda como Netflix, con 125 millóns de usuarios en todo o mundo.
A interfaz principal permite o acceso rápido a aplicacións como YouTube, Twitter, Vimeo ou Spotify. Xunto a elas, aparecerá como suxerida desde esta semana a nova aplicación de La Voz, lista para ser instalada. Os usuarios que accedan a través dunha smart tv pódena buscar en Google Play Store. Unha vez descargada, terán acceso directo aos contidos en vídeo do medio de comunicación líder de Galicia e que rexistrou o pasado mes de maio máis de dez millóns de usuarios únicos na web.
Ordenados en varias categorías, os vídeos móstranse nun carrusel que permite navegar facilmente entre eles ata chegar ao que máis nos interese. Teñen un oco especial os contidos dos dous principais equipos galegos de fútbol, o Celta e o Dépor, con vídeos das canles de La Voz Bancada de Río e Torre de Marathon. En canto o usuario seleccione unha das miniaturas, outra pantalla daralle información extra do vídeo.