A Brilat colabora na recreación dun hospital militar de campaña en pleno conflito na antiga Iugoslavia
25 mares 2018 . Actualizado ás 05:00 h.O pasado martes os montes do pequeno municipio coruñés de Coirós serviron de escenario para a recreación de varias escenas da serie Serramoura (TVG, domingos 22.00 horas). Nada fóra do común se non fose porque, nesta ocasión, os protagonistas da ficción non se atopaban na vila madeireira máis famosa de Galicia. Estaban nos Balcáns.
A maxia da televisión fixo posible que un monte recóndito e húmido, de raíces levantadas, evocase por unhas horas a afastada paisaxe balcánico. Para darlle o toque perfecto, desprazáronse ata alí un camión e dous todo terreos da Brilat. En poucos minutos e só entre oito militares puxeron en pé un auténtico hospital de campaña.
Ata alí foron tamén máis de cincuenta persoas da produtora da serie, Voz Audiovisual, da Corporación Voz de Galicia. Entre eles ían unha ducia de figurantes ataviados con roupas e uniformes que evocaban os utilizados na zona no ano 96. A choiva foi unha constante durante a gravación, pero poucos minutos abondaron ao equipo para constatar que o esforzo ía valer a pena. «Así dá gusto traballar», dicía Chus Fernández, axudante de produción, ao referirse á colaboración da Brilat, inestimable desde o minuto uno.
Tampouco lle pesaba a choiva a Óscar Pousada, quen localizara a recóndita paraxe de Coirós. Víase na cara do director, Jorge Saavedra, que dera no cravo. Estaba claro que non ía ser unha xornada relaxada para ninguén e que o frío sería un dos recordos a abrigar. Pero desde os mozos de produción ata o persoal de maquillaxe, cámaras e vestiario, todos sabían que a maxia estaba alí. As secuencias gravadas corresponden ao capítulo 121 da ficción, que se emitirá en Televisión de Galicia o próximo mes de xuño e que narrará o paso dun dos seus protagonistas polo conflito dos Balcáns.
Mentres tanto, as cousas están máis animadas que nunca en Serramoura. Marga e Diego, os dous sarxentos da Garda Civil protagonistas desta historia, son por fin parella sentimental e acaba de pasar a súa primeira noite xuntos. Os incondicionais da serie están que non llo acaban de crer, pois os seus personaxes favoritos sólo tardaron 109 capítulos en facer algo que, desde a primeira entrega da ficción parecía inevitable. Pero a partir de agora e, tras ter resolto decenas de casos e xogarse a vida en cada un deles, a súa misión máis difícil podería consistir en manter a súa relación na intimidade. Tendo en conta que toda Serramoura vive pendente deles non vai ser nada doado.
Novo caso que resolver
Por sorte para eles, o traballo nunca falta o o posto de mando do tenente Penedo, que non tadará en adxudicarlles un novo caso: A acusación dunha moza contra o seu pai por suposto intento de asasinato.
Mentres tanto, Rebeca López de Longoria, persoa de confianza da Wood Corp en Serramoura, segue coaccionando aos veciños para que vendan as súas terras e negocios. Cansado dos seus métodos Hugo, o avogado de Evaristo Fiuza, ideará un retorto plan para o que necesitará a axuda de Santos, un dos homes con menos escrúpulos da vila.
Tras a marcha de Gloria e a cesión dos seus montes a Raquel, esta trata de facerse co control da situación e manter a correcta actividade no serradoiro. Pero a viúva de Soutelo empeza a ter dúbidas sobre a capacidade de liderado da maior das irmás Neira. Dona Teresa ofrecerá a Raquel unha clase maxistral sobre métodos pouco éticos para triunfar nos negocios. Seguirá os seus consellos?
Redes sociais
Para estar ao tanto de Serramoura , os espectadores poden seguir a gravación e descubrir todos os seus segredos en www.facebook.com/serramoura.serie , www.twitter.com/serramoura_tvg, www.instagram.com/ramoura.serie e www.serramoura.com
Ao servizo da defensa nacional e as necesidades sociais
M. D. LÓPEZ
O 24 de xaneiro de 1966 créase a Brigada de Infantería Aerotransportable, Brilat. Cunha base en Galicia, na provincia de Pontevedra, trátase dunha gran unidade especialmente apta para o seu emprego en terreos difíciles e climatoloxía variada. Organizada, equipada e adestrada para ser proxectada nun breve prazo alá onde as esixencias da defensa nacional requírano; utilizando calquera medio de transporte. Posúe capacidades de defensa aérea, loita contracarro, potencia de lume, e autonomía loxística, que fan que poida ser empregada en todo tipo de operacións convencionais, tanto de carácter ofensivo como defensivo; de forma autónoma ou encadrada nunha forza de carácter nacional ou . Esta brigada está dotada dos sistemas de armas, vehículos e materiais máis modernos e de última xeración. No ano 1995, comezou a súa experiencia de participación en Misións de Paz. Tanto no marco de Nacións Unidas como no da Alianza Atlántica. A Brilat colaborou activamente, desde a súa creación, coas autoridades civís na resolución de situacións de catástrofe, como nas sucesivas inundacións da zona de Padrón, na reposición de pontes nas zonas de Xistral, en 1983; e Negreira, en 1987, ou en operacións de salvamento de buques, como no de Erkowit, en 1971, e o Casón en 1987. En novembro do ano 2002, co gallo da catástrofe do Prestige, colaborou tanto na limpeza de praias como nos labores de apoio, proporcionando medios de transporte, cociñas e comedores. No marco da colaboración en situacións de risco que desbordan as capacidades das autoridades civís, participa nas campañas de prevención e extinción de incendios forestais da Xunta de Galicia. Tamén colabora con todo tipo de eventos sociais, culturais e deportivos con diversas institucións e asociacións, na medida en que a instrución, o adestramento e os medios dispoñibles permíteno.