A produción de Movistar+ emitirase na plataforma de pagamento a partir do día 27
13 oct 2017 . Actualizado ás 05:00 h.A zona, a nova serie de televisión dos irmáns Sánchez-Cabezudo, Jorge e Alberto, recrea un escenario non moi afastado no tempo no que un accidente nuclear ha devastado parte de España; tres anos despois, os sobreviventes xa non se fían de nada. Un argumento que, en palabras do actor protagonista, Eduard Fernández, é «unha alegoría perfecta do momento actual: da desconfianza e da perda das ilusións e da inxenuidade».
Coincidencias que non son casualidade, senón froito da documentación que desenvolveron profusamente en Chernóbil e Fukushima, explica Alberto Sánchez-Cabezón, coa intención de trasladar aquela sociedade que xurdiu tras as explosións a un escenario local.
«Despois do accidente, as regras e os roles sociais déronse a volta, non só polo impacto económico que xeraron as indemnizacións, senón pola situación de desamparo na que quedaron as persoas. Todo iso se parece moito ao momento que se vive e que vivimos despois da crise», indican.
Sitges volveu ser escaparate para as series de televisión de xénero, esta vez unha produción de Movistar+ que se emitirá na plataforma de pagamento a partir do día 27.
Na ficción, anos despois do accidente, o inspector Héctor Uría volve ao servizo recuperado tras ser o único sobrevivente do primeiro grupo que acudiu en socorro da central. A aparición dalgunhas persoas brutalmente asasinadas na zona de exclusión lévao a unha investigación que axitará a nova orde establecida no mundo xurdido tras a catástrofe.
Segundo os directores, creadores da multipremiada serie Crematorio (2011), A zona mestura xéneros, que pasan do policíaco e criminal rozando a ciencia ficción futurista, ao drama humano máis profundo.