Os actores de «Urxencia cero» recibirán aos seus fans no estudio

A cita é este venres, ás 17.30 horas, nos decorados da serie na sede de Voz Audiovisual, na Coruña

.

Redacción

Os doutores de Urxencia cero pasan consulta aberta aos seus fans no hospital Francisco Balmis. Este venres, ás 17.30 horas, a produtora Voz Audiovisual invita a todos os seguidores da serie que emite Televisión de Galicia os domingos ás 22 horas a entrar nas súas instalacións da Coruña para coñecer en persoa os decorados onde se recrea o centro hospitalario máis televisivo de Galicia.

As portas de Voz Audiovisual, produtora de series que fixeron historia en TVG como Mareas vivas, Padre Casares, Matalobos e Serramoura, abriranse para os fans de Urxencia cero. Alí recibiranlles os protagonistas da súa serie favorita, quen exercerán de anfitrións na súa visita aos decorados do Francisco Balmis.

Os corredores do hospital de ficción servirán como escenario para un coloquio directo entre actores e espectadores, que poderán realizar as preguntas que desexen sobre a ficción, así como fotografarse nos espazos onde os doutores Losada, Muíños, Serantes e todos os seus compañeiros exercen o seu traballo.

Entrada libre con reserva previa

A entrada a este encontro é libre (ata completar o aforamento) e, para poder asistir, só hai que reservar praza a través do correo electrónico vozaudiovisual@vozaudiovisual.com, ou nos perfís sociais da serie: www.facebook.com/urxenciacero e na conta de Twitter \UrxenciaCero. A visita comezará ás 17.30 horas e estenderase por espazo de dúas horas.

Urxencia cero é unha ficción cento por cento galega, de gran calidade e que logra ser trending topic nacional cada domingo grazas a unhas tramas que, en apenas uns capítulos, lograron atrapar a unha lexión de seguidores. A ficción utiliza como escenario unha unidade de transplantes para contar as historias das persoas que alí traballan e que, nas súas longas xornadas laborais cheas de tensión, desenvolven grandes amizades, experimentan rifas e desconfianzas entre eles, pero, por encima de todo, viven tamén grandes relacións de amor.

A vida de Daniel Losada, un as da cirurxía que traballa salvando vidas na unidade de transplantes do prestixioso hospital Francisco Balmis, parecía perfecta e tranquila, cunha nova parella, que é a súa compañeira de traballo. Pero todo cambiou o día que cruzou a porta a súa exnovia de hai 19 anos, a doutora Muíños, cunha filla da mesma idade. Muíños é tamén unha prestixiosa cirurxiá e veu para quedar, pois é a última fichaxe do equipo médico do hospital. Isto desencadea unha revolución no hospital, cuxo persoal esconde secretos e historias inconfesables que os espectadores esperan desentrañar. As tramas de Urxencia cero narran historias que son por momentos serias e, outras veces, capaces de arrincar a maior gargallada, pero sempre cargadas de sensibilidade.

Votación
3 votos
Comentarios

Os actores de «Urxencia cero» recibirán aos seus fans no estudio