Tile Pro é un rastreador Bluetooth que permite localizar facilmente os obxectos que perdemos de vista a través dunha aplicación no móbil e unha alarma incorporada
15 dic 2018 . Actualizado ás 00:17 h.Un exemplo doado: estamos no aeroporto facendo tempo para para coller un avión, pola megafonía insístennos en que teñamos coidado coas nosas pertenzas, pero ás veces perdemos de vista a nosa maleta uns segundos (cando nos levantamos para tirar un papel, cando estamos a pagar nunha tenda...). Unha situación que nos crea certa inseguridade e que se soluciona facilmente colocando un rastreador Bluetooth na equipaxe. Iso é o que fai Tile.
Esta pequena pastilla, un cadrado de apenas 4 centímetros de lado e entre 11 e 15 gramos de peso, comunícase cun aplicación no noso móbil que nos di a súa localización exacta. E se é necesario, podemos facer que soe e atopar sen esforzo aquilo que acostumamos despistar. Como unhas chaves, un bolso ou calquera outra cousa que se nos ocorra. Quen non se volveu tolo buscando algo que sabe que está en casa pero non aparece?
O funcionamento é sinxelo. Instalamos a app, activamos o Bluetooth e os servizos de localización e xa temos o Tile configurado. Logo suxeitámolo ou introducimos naquilo que non queremos perder (ten unha arandela para fixalo). No noso smartphone podemos ver a súa localización sempre que estea nun radio de acción determinado. No caso do Tile Pro é de 90 metros e o volume da alerta é maior que noutras versións. Pódese ademais elixir distintas melodías para situar o Tile.
O dispositivo conta cunha batería que dura un ano; despois, basta con substituíla para seguir utilizándoo. O usuario pode configurar varios Tile e controlalos todos desde o seu móbil. Outra das vantaxes é a súa integración con Siri, Alexa ou Google Assistant, para poder preguntarlles directamente onde está a nosa pertenza. E aínda que a aplicación é gratuíta, hai servizos de pagamento, como recibir un historial de localización.
Outros servizos premium (a subscrición custa 3,50 euros ao mes ou 35 euros ao ano) inclúen a substitución gratuíta da batería; alertas intelixentes cando saímos de casa sen os nosos obxectos importantes; compartir o tracking dos Tiles con familiares e amigos, para que poidamos REVISAR atopalos máis facilmente (igual non está no noso radio de alcance, pero si no deles)/deles), e acceso a unha liña de axuda por mensaxes de texto.
O Tile Pro costa 35 euros e a versión Mate, que pesa a metade, baixa a 25. Hai tamén rastreadores que no canto dunha anilla teñen unha pinza, para poder suxeitalos a un fajo de billetes, por exemplo.
E que pasa se o que perdemos de vista é o teléfono e non o Tile? Pois nada, porque ao estar conectados podemos pulsar o botón que ocupa o centro do rastreador e o noso móbil será o que soe, desvelando o lugar onde se atopa.
A empresa Tile, con sede en San Mateo (California), converteu este pequeno dispositivo no rastreador Bluetooth máis vendido do mundo. Ata o momento distribuíron máis de 15 millóns de unidades e nos Estados Unidos copan o 80 % do mercado. Segundo os seus datos, cada día son localizados por este sistema máis de 3 millóns de obxectos. O CEO da compaña, Charles (CJ) Prober, ocupou anteriormente cargos relevantes en GoPro e Electronics Arts.