Cunha capacidade de 1,9 MWh, está composta por baterías reutilizadas de ións de litio. Compensa as fluctuaciones da rede e optimiza a subministración de enerxía
27 may 2019 . Actualizado ás 15:11 h.Audi está a electrificar Berlín: a marca dos catro aros puxo en marcha no Campus EUREF a unidade de almacenamento de enerxía eléctrica máis grande de Alemaña. Cunha capacidade de 1,9 MWh, emprega baterías de ións de litio procedentes de vehículos experimentais, para ensaiar diversas posibilidades de interacción entre coches eléctricos e a rede eléctrica. O obxectivo é o funcionamento intelixente en rede, para promover a transición de enerxía.
Audi comprometeuse coa mobilidade libre de emisións, establecendo obxectivos claros de cara a esta visión. Xa en 2025, ao redor do 40 % de todos os novos modelos Audi comercializados equiparán un sistema de propulsión electrificado. Para mediados da próxima década, isto equivalerá a preto dun millón de coches electrificados ao ano. Segundo aumenta o número de modelos eléctricos, tamén o fai o que podemos considerar unha gran unidade móbil de almacenamento de enerxía. Comporta un enorme potencial, sempre que se faga un uso intelixente da capacidade de almacenamento. É, xa que logo, particularmente importante integrar os vehículos eléctricos na industria enerxética.
Se un de cada dez coches en Alemaña fose eléctrico, isto correspondería a unha unidade flexible de almacenamento de enerxía cunha capacidade de case 200 GWh. Conectar coches eléctricos con enerxías renovables de xeito intelixente pode ter un efecto positivo na transición enerxética. Isto permitiría recargas con enerxía solar ou eólica, dependendo da súa dispoñibilidade. Tamén sería potencialmente posible reaccionar de forma flexible ás fluctuaciones puntuais de enerxía na rede. Audi está a colaborar con socios procedentes da industria enerxética (The Mobility House, por exemplo) para facer realidade esa visión.
A unidade de almacenamento do Campus EUREF, coa que se ensaia ese caso concreto de utilización, comprende unha área de 110 metros cadrados e serve como laboratorio de probas reais para outras aplicacións. Está conectada á rede enerxética de voltaxe media en Berlín cun megawatt de potencia, o que corresponde ao requirimento media de recarga duns 200 coches eléctricos. Coa súa capacidade de 1,9 MWh, a unidade de almacenamento fornece á totalidade do campus, de 5,5 hectáreas, electricidade para case dúas horas.
As estacións próximas de carga rápida, onde os coches eléctricos poden recargar cunha potencia de ata 175 kw, son outro posible uso. Para asegurar que o alto requirimento de electricidade sexa fornecido da forma máis económica posible, e que a rede local enerxética non sexa sometida a unha excesiva tensión, a unidade de baterías funciona tamén como un tope amortecedor. A súa integración intelixente na rede eléctrica permite ao almacén enerxético absorber un exceso de electricidade proveniente de sistemas eólicos ou fotovoltaicos, ou da propia planta enerxética/calefactora do campus. Isto compensa as fluctuaciones na rede, actúa fronte ás puntas de demandas locais, e contribúe a evitar apagamentos, ao estabilizar a rede de distribución. Suavizar os picos de carga e compensar dese modo as frecuentes fluctuaciones reduce os custos de enerxía grazas aos altos niveis de eficiencia e aos rápidos tempos de resposta. Ademais, a subministración de enerxía é optimizado en termos da súa neutralidade de CO2.
Debido á gran cota de enerxías renovables dos distintos sistemas de xeración de electricidade na área próxima, Berlín ofrece condicións ideais para o desenvolvemento dun control intelixente de recarga, que pode ser ampliado para incluír no futuro un crecente número de coches eléctricos. Os socios do proxecto proponse realizar un experimento de modelos enerxéticos con parques eólicos en Brandeburgo-Pomerania Occidental, para mostrar como un exceso de electricidade verde pode ser almacenado no Campus EUREF de forma programada. Os aeroxeradores xa non terían que desconectarse da rede en caso dunha excesiva produción eléctrica temporal. Sería algo similar a un pequeno bloque de edificios nun mundo sostible de enerxía e unha achega ao almacenamento industrial de grandes volumes de electricidade sobrante, algo que Audi estivo practicando desde 2013 en Werlte coa súa planta conversora de electricidade a gas.
Ademais da investigación en interfaces para unha integración intelixente na rede enerxética do futuro, a unidade de almacenamento de baterías do Campus EUREF proporciona experiencias que serán incorporadas en futuros proxectos. Os enxeñeiros de Audi están ensaiando o uso de unidades estacionarias de almacenamento de enerxía na rede enerxética, creando así un modo de reutilizar baterías usadas de coches eléctricos. Unha aplicación sensata e conservadora de recursos, dado que as baterías manteñen a maior parte da súa capacidade despois de ter sido utilizadas en coches. Ademais, Audi está a desenvolver conceptos para reciclar baterías procedentes de módulos xa utilizados dunha forma efectiva.