É a primeira vez que se lle aplica a un peso pesado de Internet o regulamento europeo sobre protección de datos
04 oct 2018 . Actualizado ás 05:00 h.Irlanda anunciou este mércores a apertura dunha investigación polo pirateo de 50 millóns de contas da rede social Facebook, a primeira aplicación a gran escala do regulamento europeo de protección de datos. A Comisión Irlandesa de Protección de Datos (DPC) abriu unha investigación para «verificar se Facebook cumpriu coas súas obrigacións legais de protección de datos», dixo o portavoz do organismo nun comunicado.
Facebook, cuxa sede europea se atopa en Irlanda, «informou á DPC de que a súa investigación interna seguía en marcha e que a empresa continuaba tomando medidas correctivas para atenuar os potenciais riscos para os usuarios», precisou.
Con esta investigación aplícase por primeira vez contra un peso pesado de Internet o regulamento europeo sobre a protección de datos (RGPD), que entrou en vigor na UE o 25 de maio para protexer os datos dos seus cidadáns.