O ente autonómico asegura que a concesión non se autorizou se o proxecto non tivese licenza municipal
30 novs 2021 . Actualizado ás 05:00 h.Esta fin de semana, veciños da Illa mobilizáronse para reclamar a Portos de Galicia que paralice as obras de construción dunha nave de invernaje de embarcacións que se vai levantar en Aguiuncho e que derrogue a concesión da parcela á empresa Novos Adaxes. Entenden que a chaira debe quedar libre para dar servizo a mariñeiros e bateeiros, tal e como explicaron en rolda de prensa representantes do sector do mar e o propio alcalde.
De momento, a protesta non parece haber grande efecto. Portos de Galicia saíu onte á palestra para lembrar que o expediente que ampara a construción da nova nave «conta con todos os requisitos legais para o seu outorgamento e foi sometida a exposición pública sen recibir ningunha alegación».
Segundo explican desde o ente dependente de Mar, a concesión «é acorde ao Plan de Usos do porto, encaixando a súa localización nunha zona de solo destinada a usos complementarios entre os que se atopa o da nave de invernada». Ademais, «cumpre coa disposición transitoria recollida na lei de Portos de aplicación nos casos en que non existe Plan Especial do porto, como é este, e que limita a altura a 12 metros».
Segundo recalcan desde ese gabinete autonómico, «Portos pediu informe técnico ao Concello da Illa de Arousa en tres ocasións buscando as maiores garantías sobre este expediente e o goberno local non informou desfavorablemente esta solicitude en ningunha das tres ocasións, nin propuxo modificacións sobre o proxecto». «Ademais Portos de Galicia solicitou ao concesionario unha análise de integración paisaxística e modificacións para a maior integración». E, para dotar ao proceso das maiores garantías, «de xeito voluntario, Portos de Galicia solicitou adicionalmente un informe xurídico previo desta concesión e condicionou o outorgamento da concesión á obtención de licenza municipal nun prazo máximo de seis meses». É dicir: se o Concello non concedese ese permiso «non cabería a concesión. Polo tanto, a modificación da concesión faise efectiva toda vez que o Concello outorga a licenza». Entenden desde Portos que cumpriron coa súa obrigación de tramitar a concesión e outorgala esixindo, previamente, «todas as garantías».
Por outra banda, os responsables da empresa emitiron tamén un comunicado a través das súas redes sociais no que lamentan a actitude do alcalde, o socialista Carlos Iglesias . «Pídelle a Portos que revogue a concesión para a nave, pero el recoñece que concedeu a licenza municipal ‘por imperativo legal' e recoñece que, se non o fixo, estaría prevaricando. Pois ben, está a pedirlle a Portos que prevariquen eles». Sinalan, ademais, que Iglesias coñecía o proxecto desde principios do 2020.