Nova Pescanova inaugurou no Grove o seu centro de investigación acuícola
11 novs 2021 . Actualizado ás 18:08 h.O próximo verán, o Grupo Nueva Pescanova ten previsto empezar a comercializar os primeiros polbos de produción acuícola do mundo. Son descendentes directos de Lourditas e Goliat, a parella seleccionada hai anos para iniciar un camiño que os agoreiros aseguraban que non ía levar a ningunha parte. Así o lembrou onte o conselleiro delegado deste grupo, Ignacio González. «Moitos nos dicían que era imposible, que os milagres, a Lourdes». De aí o nome elixido para a femia cuxos tataranietos xa crecen nos tanques do Pescanova Biomarine Center, o primeiro centro privado de investigación acuícola de España, que foi inaugurado oficialmente onte, nun acto ao que acudiron desde o presidente da Xunta, AlbertoNúñez Feijo ou, ata o propietario de Abanca, Juan Carlos Escotet. A ocasión merecíao.
Chamado a ser un «referente en I+D+i en acuicultura », o Biomarine Center está situado no Grove, nas mesmas instalacións nas que nos anos 80 comezou a funcionar Insuíña, a primeira planta para a cría de rodaballo. Foi aquel un proxecto pioneiro que converteu a Pescanova «durante anos, na única empresa que cultivaba esa especie», como sinalou o presidente de Nova Pescanova, José María Benavent. Sobre aquelas modestas instalacións con tellado de uralita construíuse un moderno edificio: catro mil metros cadrados nos que traballarán 40 científicos chamados a investigar como producir en catividade novas especies —das 250.000 especies mariñas que existen só se sabe producir en acuicultura 580—, como mellorar a súa nutrición e como afinar os procesos para facer eses produtos aínda máis saudables, á vez que a súa produción se volve máis sostible.
O Pescanova Biomarine Center representa a alianza da empresa coa innovación, renovando uns lazos que se empezaron a tecer no 1961, cando a compaña puxo no mar o primeiro barco conxelador transoceánico. A esa efeméride referiuse Benavent para recalcar que a innovación forma parte da xenética dunha multinacional con raíz galega. Unha compaña que «venceu notables dificultades financeiras», tal e como recoñeceu o presidente da Xunta, Alberto Núñez Feijoo, pero que logrou vencer as adversidades para seguir crecendo.
Acuicultura 4.0
Percorre ese camiño buscando aliados: desde O Grove participarase en proxectos con universidades, centros de investigación e, tamén, socios tecnolóxicos como Microsoft, con quen están a desenvolver tecnoloxías de intelixencia artificial e big data para a súa aplicación na acuicultura, permitindo o control, en tempo real, das 17 plantas de produción que a empresa ten repartidas polo mundo, catro delas en Galicia.
O Biomarine Center supuxo un investimento de 7,5 millóns de euros. Uns fondos cos que se creou unha estrutura na que, ademais da investigación, hai espazo para a produción en catividade de rodaballo e polbo. E que se complementa, aínda, cun museo que pretende divulgar a realidade dos océanos, explicando os problemas que afrontan e expondo, tamén, as alternativas que ofrece Nova Pescanova. Tal e como destacou Benavent durante a súa intervención, a acuicultura está chamada a seguir crecendo —hoxe produce o 50 % da proteína mariña que se consome—, o que permitirá reducir a presión que se exerce sobre o mar.