A elevada concentración de algas tinguiu dunha cor alaranxada a auga das praias de Corrubedo
SOMOS MAR
Ante as persistentes chamadas, ao lugar acudiu un técnico de Medio Ambiente, que confirmou que se trataba do que popularmente se coñece como marea vermella
07 sep 2021 . Actualizado ás 05:00 h.O que resultou ser a presenza dunha elevada cantidade de microalgas en Corrubedo provocou un regueiro de chamadas á Policía Local de Ribeira e ao 112 durante a xornada do domingo. A auga de praias como a do Prado amenceu tinguida dunha cor alaranxada que levou a moitos a crer que se produciu algún tipo de vertedura no mar.
Con todo, a realidade é que o causante da tonalidade da auga, entre marrón e alaranxada, é un organismo mariño inocuo para o ser humano. Ante as persistentes chamadas, ao lugar acudiu un técnico de Medio Ambiente, que confirmou que se trataba do que popularmente se coñece como marea vermella, e que está causada por unha microalga que, en concentracións moi elevadas, tingue o mar dunha característica cor ocre.
Aínda que se trata dun fenómeno natural que non é prexudicial para o ser humano, si se recomenda que as persoas con peles moi sensibles eviten o baño. A marea vermella tamén afectou días atrás a areais do Grove e da ría de Pontevedra.