Os traballos poden presentarse ata o 8 de xullo
19 jun 2021 . Actualizado ás 05:00 h.O grupo conserveiro Jealsa-Rianxeira promove un concurso de relatos dirixido a persoas de todas as idades. Poderán ser tantas historias reais como de ficción e o único requisito que se estableceu é que teñan como temática o mar.
As persoas que estean interesadas en concorrer teñen de prazo ata o 8 de xullo para facer chegar os seus textos á empresa a través das redes sociais de Rianxeira. As bases xa se poden consultar na páxina web da firma.
Unha vez finalizado o período de recepción dos traballos, os escritores Carlos Miguel Cortés e David Galán analizarán os textos e elixirán dez, que serán os protagonistas de Radio ondiñas, un contido de audio que o grupo difundirá a través de Internet. Desta primeira selección sairán dous gañadores, que se farán cun premio en metálico de 300 euros cada un, e dous segundos clasificados, que recibirán 200 euros.
Con esta iniciativa, o grupo conserveiro boirense pretende pór de relevo, unha vez máis, a importancia que ten o mar en Barbanza, non só como fonte de traballo e riqueza, senón tamén como inspiración literaria.