Licitada por 165.000 euros a renovación da vixilancia do banco marisqueiro das Pías
SOMOS MAR
O contrato forma parte do plan autonómico de rexeneración
01 may 2021 . Actualizado ás 05:00 h.A Consellería do Mar, a través da empresa pública de Servizos Agrarios Galegos (Seaga), licitou a renovación do servizo de vixilancia e control da zona marítima das Pías; unha acción incluída no plan de rexeneración do banco marisqueiro que contempla, así mesmo, outras disposicións como a achega de áridos que tamén saíu a contratación recentemente.
De acordo coa información recollida nas bases do procedemento en curso, o presuposto base de licitación é de 164.560 euros (impostos incluídos) destinados á contratación do servizo de inspección nesa zona da ría. Alí instalouse, no 2019, unha batea de control para levar a cabo parte das tarefas atribuídas ao contrato, cuxo obxecto é a «restauración da biodiversidade» no banco marisqueiro, que, no entanto, cada ano produce menos ameixa. Está en números vermellos. Tanto que o 2020 pechouse con 12.770 quilos extraídos fronte aos 31.586 do 2019, que xa foi pésimo. Segundo os datos oficiais da Xunta de Galicia, no que vai de ano, das Pías saíron 8.551 quilos do bivalvo autóctono.
Condicións
O servizo á boia deberá dispor, como ata agora, de dous gardas rurais con especialidade de guardapesca marítimo, que traballarán de luns a venres, e con embarcación da 5ª lista.
Nas condicións técnicas exixibles establécese, entre outros puntos, que se permitirá o acceso á embarcación adscrita ao servizo ao persoal de Seaga, da Consellería do Mar ou do Intecmar», as entidades autonómicas que se encargan do control, seguimento e xestión da zona produtiva.
Campaña de algas
Os primeiros días de faena na campaña de extracción de algas acumularon 14.000 quilos, cun prezo estimado de 7.000 euros, Ou o que é o mesmo, a 0,50 euros o quilo, un prezo moi inferior ao do ano pasado, cando se cotizou, de media a 0,90 euros o quilo.
A Xunta de Galicia autorizou a sete embarcacións locais -14 mergulladores- á extracción das algas entre febreiro e outubro, pero a súa actividade, iniciada esta semana, centrarase nas próximas semanas, ata xuño.
O plan de xestión permite as especies Undaria pinnatifida, coñecida como wakame; Laminaria ochroleuca ou alga kombu; Codium tomentosum ou ramallo de mar e Ulva spp, popularmente coñecida como leituga de mar.