A piscicultura española aplaude que se amplíen por seis anos máis os aranceis da UE á troita turca

Como España, Turquía produce troita arcoíris en acuicultura . Pero mentres dos Pireneos para abaixo o consumo de peixe supera os 25 quilos por persoa e ano, os turcos con seis quilos ao ano teñen suficiente. E como lanzan anualmente ao mercado 95.000 toneladas -fronte ás 16.000 españolas- e as súas empresas, segundo unha investigación da Comisión Europea, producen ao 48 % da súa capacidade teñen dabondo para consumir alí e, de paso, mandar ao exterior. O da Unión Europea é o seu mercado preferido. Porque se lle compra, queda preto e xa ten canles ben establecidas para introducir o seu produto, apunta a Asociación de Produtores de Cultivos Mariños (Apromar).

A patronal mostrou a súa satisfacción pola decisión de Bruxelas de manter os aranceis compensatorios ao produto dese país que impuxo no 2015 ao verificar que o Goberno turco estaba subsidiando ás empresas de xeito irregular e, coa súa exportación aos mercados europeos, causando un prexuízo importante aos produtores de troita arco iris de acuicultura da Unión Europea.

Ese primeiro paquete de aranceis -que ían do 1,5 ao 9,5 % do valor segundo a empresa exportadora- caducaba agora e no 2019, vendo preto xa o final do castigo comunitario, os acuicultores da UE pediron unha revisión do caso. Ankara asegurou que se produciu un cambio no sistema e os seus produtores xa non estaban subvencionados, polo que demandaba a retirada dos aranceis. Pero a investigación que durante todo un ano realizou Bruxelas comprobou que non era así, polo que as cargas continuarán polo menos durante seis anos máis, algo do que se congratulan en Apromar.

De todos os xeitos, esas medidas de compensación son apenas unha tirita para curar a ferida da competencia desleal. De acordos cos cálculos da Comisión, a capacidade excedentaria de Turquía en troita é de 100.000 toneladas, que vén ser o 70 % desa especie que se consome na UE. E por iso o comunitario é, de lonxe, o mercado máis importante para os turcos, aínda a pesar dos aranceis. Envía aos Vinte e sete un 59 % máis do que manda ao seu segundo mellor cliente, que é Rusia. Xuntos, absorben o 85 % de toda a troita turca que se exporta. Por iso Apromar cre que a medida comercial non é suficiente. A entidade seguirá «despregando accións legais e políticas» para conseguir que as empresas españolas de acuicultura poidan competir en igualdade de condicións fronte ás importacións, veñan de onde veñan. E non só atenderán á procedencia, tamén preitearán contra prácticas desleais en produtos como a robaliza, a dourada ou a corvina.

---

---

---