Antes, terán que superar exames físicos para os que deberán achegar un certificado médico de aptitude para someterse á proba da cámara hiperbárica e unha PCR negativa
11 abr 2021 . Actualizado ás 05:00 h.A Dirección Xeral de Desenvolvemento Pesqueiro, da Consellería do Mar, convocou dous cursos de recolector de recursos específicos con técnicas de mergullo que se impartirán no Instituto Galego de Formación en Acuicultura (Igafa), na Illa de Arousa.
Son 24 as prazas que se ofrecen -doce en cada seminario- e a inscrición estará aberta ata o 23 de abril.
Segundo informa a Consellería do Mar nun comunicado, o primeiro dos cursos de formación realizarase entre o 24 de maio e o 15 de xuño, de 15.30 a 20.30 de luns a venres. O segundo impartirase, tamén pola semana, entre o 16 de xuño e o 8 de xullo, en horario de 15 a 20 horas.
O obxectivo é que ao finalizar este período de formación, as persoas matriculadas acaden as capacidades para traballar nun plan de explotación a mergullo para extraer recursos específicos, como as algas, ourizos, orella de mar (peneira) ou longueirón, entre outros.
Antes de empezar o curso, o alumnado deberá someterse a unhas probas físicas en piscina. As persoas seleccionadas para eses exames publicarase o 3 de maio no taboleiro de anuncios do Igafa e na web da consellería. As probas físicas serán os días 6 e 7 de maio ás 16 horas.
Pero non será o último exame. Superada a proba da piscina, os inscritos deberán realizar o test de compresión e tolerancia ao osíxeno hiperbárico. Neste caso, a verificación faranse os días 20 e 21 de maio, ás 16 horas. De non superar este ensaio, as persoas quedarán automaticamente excluídas.
Ademais, para participar en a proba da cámara hiperbárica, o colectivo inscrito deberá presentar un certificado médico que acredite a súa aptitude para realizala e acompañalo dunha PCR negativa feita nas 72 horas previas á realización do test.
Quen estean interesados en matricularse poden consultar os requisitos necesarios, a documentación que se require, os criterios de selección e o material necesario para realizar os cursos tanto no Igafa como na Consellería do Mar.