Unións Agrarias afirma que os gandeiros de carne son os auténticos defensores do medio ambiente
GANDERÍA
Criadores de reses de toda a provincia se manifestan polo centro de Lugo en protesta polos baixos prezos
22 oct 2021 . Actualizado ás 17:40 h.Eloxio e defensa dos gandeiros de carne como auténticos defensores do medio ambiente. Así se expresou este venres, en Lugo, Roberto García, secretario xeral de Unións Agrarias.As súas palabras chegaron ao final dunha marcha na que criadores de reses toda a provincia percorreron o centro da cidade amurallada para protestar polos baixos prezos da carne. Na súa intervención destacou que os gandeiros cumpren unha función de conservación da biodiversidade moito maior que persoas que teorizan sobre ecoloxismo.«Sodes os verdadeiros protectores do medio natural», dixo aos asistentes.
«Prezos si, desprezos non», berraba, antes do comezo da marcha, o responsable de sectores gandeiros da organización, José Ramón González. García tamén tocou outro polémico asunto de actualidade, o dos danos do lobo e do debate sobre a súa condición de especie cinexética. Para o secretario xeral de Unións Agrarias, a protección deses animais non pode estar por diante da protección dos gandeiros.
En canto aos prezos, na manifestación denunciouse que hoxe se paga aos criadores de carne máis ou menos o mesmo que no 2015 (de 4,20 a 4,80 euros por quilo/ canle), mentres os custos de produción incrementáronse, sobre todo nos últimos meses.
«Non pedimos que o consumidor pague máis, pedimos que se reparta de xeito transparente», manifestou García en defensa do papel da gandería. A protesta empezou ante o multiusos da Xunta, na Ronda da Muralla, e rematou ante a Subdelegación do Goberno, na rúa Armanyá.