Unha granxa de Cospeito, elixida pola compaña fundada en California e que agora ten a súa base en Chicago para mostrar a súa aposta por Galicia
08 abr 2021 . Actualizado ás 18:00 h.A Granxa Grixeira, situada no Arneiro (Cospeito), chama a atención. José García e Zeltia González teñen máis de 200 cabezas de gando vacún, instaladas con todos os adiantos que hoxe poden aparecen nunha granxa punteira. Con todo, tamén é rechamante o poste que se colocou a varias decenas de metros das naves e que reforza a idea de que a gandería de Galicia non ten nada que envexar á doutras partes de España ou de Europa.
A explotación foi elixida por McDonald's, a franquía fundada en California e que agora ten a súa base en Chicago (Illinois), para mostrar a súa aposta por Galicia. A coñecida marca estadounidense usa queixos de Entrepinares, que ten unha fábrica en Vilalba, nas hamburguesas que serve nos seus restaurantes de España. Éa unha das que fornecen leite á factoría, e esa procedencia galega quérese mostrar na mensaxe escrita na parte superior da sobremesa: «Todo ten unha orixe».
A orixe de José García tamén está na gandería. O seu pai, natural de Bazar (Castro de Rei), instalouse no Arneiro hai décadas e puxo en marcha a explotación. El traballou nunha empresa de maquinaria e noutra de autocares, pero sempre conservou relación co campo e traballou na explotación. Ao final, os prados e as vacas pesaron máis. Con el e coa súa muller á fronte, non só se ampliou a granxa senón que se lle buscou o nome actual.
Os dous comentan sen vaidade e con bo humor que lles alegra ver que a súa granxa foi elixida para reflectir ese encomio do produto galego. «É un recoñecemento a todas as granxas. Elixíronnos a nós... Sería ao azar», di el. Hai pouco máis dun ano dun ano que a explotación manda o leite, máis de 5.000 litros diarios, a Entrepinares. Non foi unha decisión doado, xa que había unha boa e longa relación con outra marca do sector lácteo (Danone). O cambio non trouxo consecuencias negativas senón todo o contrario, comentan os dous.
O poste, colocado con permiso do Concello de Cospeito, retirarase nunha data sen concretar. Os responsables da explotación asúmeno como inevitable, e lembran que lles custou un pouco crerse do todo que a súa granxa fora elixida para ilustrar a aposta da empresa multinacional polos produtos locais. Mereceu a pena, porque entre outras cousas, comentan, probaron as hamburguesas con queixo e gustoulles o sabor.
«As granxas e as fábricas galegas fano hoxe tan ben coma as de fóra»
José García cre que a gandería de Galicia pode relacionarse con calquera: «As granxas e as fábricas galegas fano hoxe tan ben coma as de fóra», di. Con todo, non por iso deixa de recoñecer que a situación do sector está suxeita a riscos: explica, por exemplo, que hai que ler con moito detalle as condicións das subvencións, posto que, comenta, non sempre é doado recibir as que un tramita.
Á marxe das complicacións que presenten certos trámites, a explotación incorporou robots e os traballos de atención ao gando son constantes: por exemplo, arránxanse as camas das reses varias veces ao día e nun lateral hase instalado unha rede cortavientos, que serve para evitar temperaturas extremas no interior. Na granxa, que realiza a recría nas súas instalacións, hai tres empregados que os responsables consideran case da familia.
Zeltia González recoñece que hai unha parte algo especial e vocacional en dedicarse á gandería: «Ten que ser porque che gusta. Non sabes o que che queda a fin de mes, non é coma noutros traballos», di. José García opina que «cada explotación é un mundo», pero admite que a necesidade de evolucionar e a capacidade de adaptarse son comúns a case todas. «Se non vas cos tempos...», di.
Inicio.
José García naceu no Arneiro e ten 40 anos. Zeltia González naceu en Muimenta e ten 32.
Evolución.
Ambos traballan na explotación que xa puxo en marcha o pai del.
Actualidade.
A explotación ten un total de 260 vacas, cunhas 150 en produción leiteira, e conta con tres empregados.