Unha comunidade de montes de Sober recibe unha axuda da Xunta para levar a cabo o proxecto
31 oct 2022 . Actualizado ás 12:17 h.A Consellería de Medio Rural aprobou a concesión dunha axuda de 12.300 euros á comunidade de montes da parroquia de Doade —no municipio de Sober — para levar a cabo un proxecto de plantación de alcornoques en terreos que están actualmente sen uso. Segundo explica o secretario da comunidade, Euloxio López Gutiérrez, está previsto plantar unhas 3.700 árbores nunha superficie dunhas seis hectáreas. Os traballos de plantación empezarán entre febreiro e marzo coa intención de telos rematados entre abril e maio.
Segundo explica López Gutiérrez, os terreos onde se realizará a plantación foron afectados hai anos por un incendio e agora non teñen ningún aproveitamento. «Non hai máis que toxos e xestas de moita altura», di. As parcelas atópanse nunha zona de forte pendente, polo que será necesario empregar escavadoras de oruga tanto para rozar como plantar. «A axuda da Xunta non será suficiente para financiar todos os traballos, pero nós contamos con fondos propios para complementar a subvención», agrega.
Aínda que os alcornoques son unha especie de crecemento lento, os responsables da comunidade consideran que na xestión dos montes comunais non se debe seguir só un criterio de rendibilidade económica no prazo máis curto posible. «Hai que pensar tamén en achegar algo positivo á sociedade e non só en sacar un beneficio canto antes mellor», di Euloxio López. «Ao plantar sobreiras formarase unha barreira moi potente contra os incendios forestais e ao mesmo tempo a paisaxe será moito máis atractiva para crear rutas de sendeirismo», agrega. O secretario da comunidade de montes de Doade apunta así mesmo que «apostar unicamente pola plantación de piñeiros é perigoso, porque o risco de incendios é maior e tamén porque pode vir unha praga de nematodos como a que hai desde hai anos nalgunhas zonas de provincia de Pontevedra, onde se prohibiu cortar as árbores por este motivo».
Unha especie tradicional
Os promotores do proxecto apuntan ademais que o alcornoque é unha especie autóctona do canón do Sil, aínda que nas últimas décadas a súa presenza háxase reducido a determinados lugares. Segundo o seu criterio, polo tanto, plantar estas árbores é unha forma de axudar a restaurar e conservar a paisaxe tradicional do territorio. Doutra banda, consideran que estas árbores son de especial interese como produtores de cortiza natural no territorio da denominación de orixe Ribeira Sacra. «É un producto que hoxe ten unha demanda moi grande e todo indica que a seguirá tendo no futuro, e non hai dúbida de que os viños da Ribeira Sacra gañarán moito se se presentan embotellados con corchos producidos neste mesmo territorio», comenta Euloxio López.
Unha aposta firme por diversificar o aproveitamento dos terreos comunais
O proxecto de plantación de alcornoques que levará a cabo o ano próximo na parroquia de Doade, segundo apuntan os seus promotores, está estrechamiento relacionado co criterio de diversificación dos usos do monte que segue desde hai tempo esta comunidade. O secretario da entidade lembra a este respecto que hai anos plantáronse cinco hectáreas con castiñeiros que agora están a empezar a producir. A comunidade de montes tamén plantou no seu día carballos americanos, aínda que —segundo puntualiza Euloxio López—, «esta árbores están medrando con máis lentitude da que esperabamos».
A entidade tamén arrendou unha parte das súas terras a unha adega para cultivar viñedos e ademais alugou terreos para ser aproveitados como pasteiros. «Pensamos que hai que aproveitar os montes de diferentes maneiras, tanto para a agricultura como a para a gandería, e facer todo o posible para que a sociedade se beneficie deles», di López.
Un novo paso
Co novo proxecto de plantación de alcornoques —di ademais o secretario da comunidade— preténdese dar outro paso no aproveitamento dos terreos, potenciando un novo recurso económico para a Ribeira Sacra, enriquecendo a paisaxe e a reducindo o risco de incendios forestais.