Entre os meses de xaneiro e marzo tramitáronse 503 autorizacións
17 abr 2021 . Actualizado ás 10:36 h.Podería ser, sen máis, que esteamos a prestar máis atención aos montes que temos ao lado de casa. Que, a forza de internarnos por camiños que transitabamos pouco, sorprendésenos ver amplas zonas de árbores talladas. Con todo, parece que é algo máis que unha simple impresión. Segundo os datos facilitados pola Xunta de Galicia, na zona de Arousa creceu de forma considerable tanto a cantidade de solicitudes de talla para aproveitamento de madeira, como o volume, en metros cúbicos, da masa que se corta. No primeiro trimestre do ano solicitáronse 503 permisos de curta, para un total de 30.021 metros cúbicos de madeira. O ano pasado, no mesmo período, solicitáronse 328 tallas para 18.116 metros cúbicos. «A meirande parte das cortas correspóndense con superficies plantadas con eucaliptos», informan desde Medio Rural.
Segundo os datos que manexa a Xunta, o número de tallas solicitadas creceu nas localidades de Ribadumia (+229), Vilanova (+30) e Vilagarcía (+7); baixou de forma considerable en Meis (-44) e notoria en Meaño (-11); non se moveu no Grove (de novo foron 13 as peticións); e oscila minimamente en Pontecesures (+1), A Illa (-1) e Valga e Catoira (-3). Entre os madeireiros consultados por La Voz de Galicia non hai unha opinión unánime sobre a situación que se está dando nos montes. Hai máis actividade, recoñecen, pero no caso do Salnés, «tampouco é un aumento tan grande», sentencian. E apuntan, cada un segundo a súa propia experiencia, as razóns que poden explicar a situación nos montes da comarca.
a situación económica
«O particular corta porque fan falla os cartos». Nun contexto de crise como no que nos movemos fai que todo o mundo intente mobilizar todos os recursos que ten ao seu alcance. E o monte é un deses bancos persoais que teñen moitas familias galegas. «O que ten un particular pode sacalo dun apuro», explica Luis Outeda, desde Meis. E eses particulares replantan? Asegura que si. «Prántase de todo, quizais máis eucalipto, coma sempre», sinala Carlos Cardeme. «O eucalipto ten mala fama, pero a xente quere ter beneficios á volta de dez ou quince anos. Se se planta pino, por exemplo, tes que esperar bastante máis», remacha Outeda.
a obrigación
«Límpanse máis as franxas de seguridade». É posible que as curtas nos montes salten máis á vista porque nas áreas próximas a núcleos poboados está a pórse unha énfase especial. «Aí estase cortando moito porque a xente parece que está cada vez máis concienciada, e as administracións tamén están apertando máis», apunta Outeda. Os incendios forestais son un problema que se repite ano tras ano, pondo en xaque a toda Galicia, de aí a importancia de manter en bo estado as zonas máis próximas aos espazos habitados.
a parcelaria
Os efectos evidentes en Ribadumia. No caso da zona sur de Arousa, é Ribadumia o municipio no que máis se disparou tanto a solicitude de tallas (229 fronte a 13 do ano pasado) como a cantidade de madeira a cortar (13.865 metros cúbicos, fronte a 2.584 do ano pasado). Neste caso, os datos teñen unha explicación evidente, segundo informa Medio Rural. Esta realidade «ten que ver coa toma de posesión definitiva das fincas da zona de concentración parcelaria de Lois-Ribadumia», xa que «cando se toma posesión dunhas fincas novas de parcelaria, os propietarios teñen un prazo determinado para que poidan vender a madeira das fincas antigas». As empresas madeireiras son conscientes desta circunstancia, e sinálano como unha das cuestións a ter en conta á hora de interpretar o incremento de solicitudes de talla tramitadas.