As parcelas forestais próximas a vivendas deben estar limpas antes de dous meses

Os titulares de terreos forestais dispoñen ata o próximo 31 de maio para realizar unha correcta limpeza das parcelas máis próximas a as vivendas. Así polo menos o establece a lei 3/2007, de 9 de abril, de prevención e defensa contra os incendios forestais de Galicia. Explican na Consellería do Medio Rural que, segundo a lexislación vixente, as persoas responsables da xestión da biomasa son os propietarios ou usufrutuarios dos terreos, que son os que se benefician desa xestión. En segunda instancia, a responsabilidade corresponde aos concellos. A Xunta, de cara a axudar aos municipios, subscribiu un convenio coa Federación Galega de Municipios e Provincias (Fegamp) e coa empresa pública Seaga para a protección das aldeas.

Esta iniciativa conta cun orzamento de 36,7 millóns de euros, dos cales Medio Rural achega ao redor de 28. O acordo ofrece diferentes servizos aos concellos segundo o nivel de prioridade que teñan estipulado. Son prioritarias, loxicamente, aquelas áreas con  maior problemática incendiaria que foron escollidas de acordo cuns criterios obxectivos relacionados coa virulencia dos incendios, coa superficie afectada, co risco de ocorrencia de incendios e cos medios e a planificación adoptada para facerlles fronte. 

Nas franxas próximas ás vivendas destas parroquias priorizadas, a empresa pública Seaga executa as limpezas, atendendo aos contratos que vai asinando cos particulares que se subscriben ao sistema público de xestión da biomasa. O prezo desta limpeza é de 350 euros por hectárea, un pagamento que no medio Rural consideran moi vantaxoso para o propietario, tendo en conta os prezos de mercado pola execución destes traballos. 

---

---

---