Propietarios forestais reclaman alentar outras especies e non só vetar o eucalipto
FORESTAL
BNG e PSdeG rexeitan a moratoria a novas plantacións que expuxo a Xunta
25 feb 2021 . Actualizado ás 09:25 h.Ata que o eucalipto nitens non chegou a Galicia, era o clima o que controlaba a expansión desta especie. Porque ao glóbulus, que se dá ben na costa, cústalle crecer en lugares altos ou fríos. Pero cando algúns propietarios do monte de zonas altas do interior viron que eles tamén podían sacarse unha renda cada 17 ou 18 anos (o que dura un ciclo medio de curta) co nitens pensaron e por que non? A Lei de Montes non prohibe plantalo en leiras forestais, unicamente está vetado en terreo agrícola, en áreas con especies autóctonas ou en Rede Natura. Pero agora a primeira revisión do Plan Forestal de Galicia, o documento que marcará o deseño do monte galego durante os próximos vinte anos e que onte foi aprobado no Parlamento galego, quere pórlle coto para fomentar a biodiversidade, o equilibrio entre distintas especies e atender unha ampla diversidade de demanda de madeira, desde a necesaria para a pasta de papel ata a que require a industria que urxe madeira certificada de calidade.
O documento prevé, de feito, a redución dun 5 % da superficie de eucalipto en Galicia nos próximos vinte anos. Ademais, o conselleiro de Medio Rural propuxo o martes aos partidos da oposición incluír unha paralización temporal das novas plantacións desta especie. Polo menos ata saber con exactitude a superficie real de eucalipto que hai distribuída pola comunidade, uns datos que achegará o Inventario Forestal continúo cuxa elaboración está xa en marcha.
A moratoria rexeitada
Esa oferta foi rexeita onte polo BNG e o PSdeG. Aínda que non será incluída agora, a moratoria de novas plantacións proposta polo conselleiro foi analizada polo sector forestal, que cre que máis aló de prohibir o eucalipto a resposta ten que ir por incentivar as plantacións doutras especies. Porque en Galicia, onde ao redor dun 97 % da superficie forestal está en mans privadas —entre particulares ou comunidades de montes—, unha suspensión, aínda que temporal, das novas plantacións de eucalipto ha de contar cun «respaldo legal que non dá un plan forestal porque ese é un documento que marca unhas pautas de actuación», explica o director da Asociación Forestal de Galicia, Francisco Dans.
Por iso é polo que para promover a plantación doutras especies ou para fomentar a madeira de calidade, crea que hai que articular unha serie de incentivos que fagan rendible decantarse por outras especies. Comparte esa opinión a Asociación Sectorial Forestal Galega (Asefoga). «Estamos profundamente comprometidos coa certificación forestal e a certificación forestal sostible. Estamos mellorando a biodiversidade e mellorando boas prácticas selvícolas. Todos vos propietarios forestais somos moi firmes niso, pero vos propietarios forestais europeos, españois e galegos temos dereitos sobre a libre elección de especies entre as permitidas na UE», lembra Dans.
Nesa liña está tamén Jacobo Feijoo, presidente de Asefoga. Explica que «a especialización nunha soa especie é perigosa, pero non é bo prohibir. Hai que dar incentivos para que se planten outras especies».
«Temos que importar madeira de calidade porque aquí non hai suficiente»
O fomento de alternativas sostibles economicamente é fundamental para que o propietario do monte entenda que pode sacar maior valor ás súas leiras forestais axustándose ás novas demandas do mercado, unhas tendencias que apuntan cara a madeiras de maior calidade, sostibles e á bioeconomía. Iso é o que opinan desde o Clúster da Madeira e para iso, como apunta o seu presidente, Manuel Iglesias , están elaborando un plan estratéxico do sector que «creemos debe de ser un instrumento para ir axustando o plan forestal».
Madeira de calidade
O desenvolvemento de toda a cadea de valor da madeira é fundamental para lograr maior rendemento ao potencial forestal que ofrece a comunidade. Desde colectivos como a Federación Empresarial de Serradoiros e Rematantes de Madeira de Galicia (Fearmaga) urxen a necesidade de que Galicia produza madeira de calidade. Antes da votación —na que BNG e do PSdeG rexeitaron a proposta de moratoria temporal na plantación de eucaliptos realizada pola Consellería—, o seu presidente Elier Ojea, explicaba que «en Galicia hai un déficit de madeira de calidade». Por iso é polo que a súa aposta sexa a biodiversidade, mellora da xenética e a silvicultura.
«Non hai déficit de eucalipto ou piñeiro de ciclos curtos para as grandes empresas tractoras de Galicia, pero nós temos que importar madeira de calidade vinculadas á carpintería ou á construción porque aquí non hai suficiente». De aí a urxencia de mellorar a xestión forestal.
