O obxectivo é conservar e pór en valor estas masas como recurso económico, social e ambiental
10 ene 2020 . Actualizado ás 13:48 h.Unha superficie mínima de 15 hectáreas na que convivan especies forestais de frondosas autóctonas cunha idade media de vinte anos. Eses son os baremos que deberán cumprir os bosques galegos que opten a entrar no Rexistro de Masas Consolidadas de Frondosas Autóctonas, un instrumento que busca mellorar a conservación e posta en valor destas masas forestais como recurso económico, social e ambiental.
Esta figura xa se mencionaba na Lei de Montes de Galicia e tamén no ditame da Comisión Forestal do Parlamento galego referido ás reformas que debían articularse neste capítulo e aprobado en setembro do 2018, pero non foi ata onte cando se publicou no Diario Oficial de Galicia (DOG) o decreto que a regula. O documento recolle que os titulares rexistrados terán prioridade á hora de recibir axudas públicas para a xestión. Tamén vantaxes fiscais.
Actualmente, segundo os datos que manexa Medio Rural aludindo ao cuarto inventario forestal nacional, hai preto de 415.000 hectáreas de frondosas autóctonas, unha superficie que supón máis do 20 % do territorio de bosque da comunidade.
Aínda que o decreto publicado onte marca que as masas candidatas a entrar no rexistro han de ter polo menos 15 hectáreas de extensión, estas poderán estar formadas por un máximo de tres unidades de superficie cunha extensión mínima de 3,75 hectáreas. O que se prima é a presenza de especies autóctonas, pero iso non evita que nos bosques rexistrados poidan convivir outras, mentres que estas non superen o 25 % do total de pés cun diámetro superior aos 7,5 centímetros.
Dúas formas de inscrición
A inscrición no rexistro poderá realizarse de oficio ou ben por petición dun particular. Neste último caso, calquera persoa ou entidade xurídica pública ou privada (tamén os montes veciñais en man común) que sexa titular ou teña dereitos sobre máis do 50 % do uso das masas forestais poderá pedilo.
Ao contrario, para rexistrar de oficio un bosque de frondosas terá que estar nunha zona de ribeira ou nun espazo situado en áreas declaradas de protección dentro dun plan de ordenación de recursos naturais ou forestais. As que contribúan a conservar a biodiversidade nunha determinada área tamén poderán adherirse por esta vía.
Desde Medio Rural aclaran, ademais, que tamén serán inscritas de oficio as masas localizadas en terreos forestais que estean dentro das franxas de xestión de biomasa para previr lumes.