Galicia produce abundante materia prima, que se manda a outras comunidades
20 oct 2021 . Actualizado ás 21:58 h.A elaboración de sidra en Galicia rexorde nos últimos anos, pero lonxe aínda dos niveis que acada noutras comunidades autónomas ou noutros países de Europa. Con todo, en varias comarcas empezan a aparecer novos proxectos, que parecen apostar por un modelo de negocio con volume reducido e con produto diferenciado. A abundancia de manzanos en bastantes zonas de Galicia facilita unha materia prima que a miúdo se vende para a elaboración noutras zonas. Gabriel López, agricultor de Roupar (Xermade) que ten manzanos, explica algunhas das claves para dar valor engadido ás mazás.
Escaso beneficio
Baixo prezo da mazá de sidra.
As mazás que recollen os distribuidores en leiras doutros agricultores páganse aproximadamente a cinco céntimos o quilo. Se o dono a recolle e a entrega ao distribuidor, o prezo pode ser de 15 céntimos o quilo. A primeira cantidade non cobre nin os custos da colleita, explica López. A segunda, tendo en conta que os gastos do dono da leira serán maiores pola man de obra, apenas deixa beneficio.
Perspectivas
Un ano irregular.
A produción do 2021, aínda sen recoller do todo, ofrece impresións variadas. As tormentas do mes de xuño —foron intensas algunhas da Ribeira Sacra— danaron a colleita dalgunhas zonas, aínda que, matiza López, con contrastes moi fortes entre leiras situadas a poucos quilómetros de distancia.
Materia prima
Distintas variedades e pleno rendemento en oito ou dez anos.
A variedade raxao, de ton avermellado, é a mazá que máis adoita usarse para sidra. Tamén se utilizan outras dúas, de tons entre verde e amarelo —a solarina, algo maior, e a durona, algo máis pequena—.
Dunha hectárea de superficie poden recollerse, en produción convencional, algo máis de 20 toneladas de mazá. Os primeiros froitos chegan dous ou tres anos despois da plantación, e o pleno rendemento, ao cabo de oito ou dez anos. Segundo detalla López, un quilo de mazás acada para elaborar unha botella (de 0,70 litros). Noutras comunidades, hai marcas que colocan no mercado botellas con prezos que van de cinco euros en diante, precisa López.
O paso de sectores como o do viño, con adegas de producións pequenas pero con claro selo diferenciador, pode ser un exemplo, di este agricultor.
Inscribirse nun rexistro e pasar controis son pasos necesarios
A persoa que desexa elaborar sidra e comercializar a produción debe inscribirse nun rexistro de embotelladores. As instalacións que vai usar son inspeccionadas antes por . SanidadeLópez, que iniciou os pasos para elaborar sidra pero que aínda non comercializa o produto, explica que un lagar de segunda man pode conseguirse por 500 ou 600 euros. Se se compra material novo, o custo pode roldar os 2.000 euros. Este venres, en Roupar (Xermade), comeza un curso de fruticultura no que se explicarán cuestións de cultivo e de poda. Tamén haberá excursións didácticas. López será un dos profesores.