Rías Baixas prevé unha boa colleita e un inicio de vendima o 10 de setembro
AGRICULTURA
As vendas da denominación de orixe están por amais do 2019
04 ago 2021 . Actualizado ás 10:33 h.A vendima prevese para este ano nas súas datas habituais, non se adiantará ao mes de agosto nin chegará ao mes de outubro, como ocorreu en anos anteriores; así o aclarou Juán Gil, o presidente do Consello Regulador Denominación de Orixe Rías Baixas, a propósito da súa visita, onte a Cambados . A previsión que manexa é que a vendima terá lugar entre o 10 e o 20 de setembro. «Estamos a rematar xa co risco de mildiu», sostén o presidente, e é que este ano parece que as pragas non deixan de axexar. Agora é o momento de prestar especial atención ao viñedo, de dar aos acios todos os mimos que necesitan despois de tanto estrés e así satisfacer a ampla demanda de mercado de uva albariña. Aínda así, Juan Gil augura que «en canto a cantidade, penso que este ano imos ter unha boa colleita», por amais dos 34 millóns recolleitos en ano pasado.
De cumprirse a previsión, superaríase a marca de produción acadado en 2011, do que resultaron 41 millóns de quilos. E o certo é que o sector os necesita, xa que a pesar da pandemia e aos peches da hostalería, as adegas case esgotaron o seu stock e a demanda de rías baixas non deixa de crecer. A mellor mostra son os datos cos que se pechou xuño, cun 1,6% máis de vendas respecto ao mesmo período en 2019. «Precisamente, onde se viu a importancia da marca denominación de orixe foi na pandemia, xa que foi capaz de capear o temporal», explica José González, conselleiro do Medio Rural.
Todo isto se está conseguindo sen contar co principal escaparate do paseo da Calzada que, ata a irrupción da pandemia, aglutinaba na Festa do Albariño a unha multitude de veciños e turistas que contribuían a baleirar as adegas coa masiva degustación que se realiza nesas datas.
«O mundo é moi grande para tan pouco albariño», esta é a frase que lembrou Juan Gil na entrega de premios ás adegas gañadoras da cata concurso deste ano, facendo fincapé na necesidade de facer crecer a superficie de viñedo, pero «facéndoo sen perder a nosa esencia».
Entrega de premios do concurso do Albariño
A trixésima terceira edición da cata concurso de viños Rías Baixas premiou onte por primeira vez coa medalla de ouro a unha adega da subzona de Soutomaior, a Adega San Salvador, que se presentou ao concurso con Noelia Babelia. A prata foi para Gran Bazán, de Vilanova e o terceiro premio para Bouza do Rei, de Ribadumia. m.M.