A USC xestiona desde hai dúas décadas unha leira experimental no monte Cristo
04 ago 2021 . Actualizado ás 12:09 h.O Concello de Portomarín ocuparase da roza dos terreos que rodean a leira vitícola experimental da Universidade de Santiago (USC) neste municipio. O profesor Julián García Berrio -membro do equipo que xestiona a leira- agradeceu este apoio na última reunión do padroado que rexe a propiedade e os usos destes terreos, do que forma parte o concello. «Para protexer a finca do risco de incendios é preciso realizar periodicamente estas rozas, que é algo que xa temos feito varias veces polos nosos propios medios», explica. «Para nós supón unha axuda moi importante que alguén nos bote unha man para realizar este labor e o Concello conta con ferramentas moi apropiadas para levalo a cabo», engade.
A leira experimental foi creada fai ao redor de dúas décadas no monte Cristo por iniciativa do grupo de investigación en viticultura e sanidade vexetal da USC e ten unha extensión de preto de 9.000 metros cadrados. Desde entón desenvolveuse nela numerosos proxectos científicos relacionados coa mellora da vitivinicultura. «É como un laboratorio que utilizamos para estudar moitas problemáticas, especialmente as que se dan no territorio da Ribeira Sacra, e tamén para a formación do noso alumnado e dos docentes», explica García Berrio.
Cristina Cabaleiro, investigadora da Escola Politécnica Superior de Enxeñaría de Lugo e integrante do equipo responsable da leira, sinala que este campo experimental realizáronse estudos sobre as enfermidades víricas da vide, a xestión dos viñedos -tanto no que respecta ao manexo dos chans como á vexetación adventicia ou «malas herbas»-, os marcos de plantación e a vexetación das espalderas, entre outros aspectos. Dispor deste viñedo, engade, «permite unha observación clara e directa de problemas de tipo fitosanitario, fisiolóxico ou fitopático que poden rexistrarse na xestión do viñedo atlántico e en particular da Ribeira Sacra».
Pola súa banda, García Berrio apunta que os resultados das investigacións realizadas na leira de Portomarín se han ir dando a coñecer en diversos ámbitos, «tanto a nivel galego como nacional e internacional».
Os investigadores botan en falta un maior apoio financeiro por parte das administracións
O equipo de investigadores da USC que traballa na leira vitícola de Portomarín -do que tamén forma parte Antonio Segura Iglesias - di botar en falta un maior apoio por parte das administracións públicas, á parte do que lles brinda o Concello. «Os fondos con que contamos para levar a cabo estas investigacións son moi limitados e durante estes anos tivemos que conseguilos en diferentes lugares e con moito esforzo», sinala Julián García Berrio. As problemas para atopar financiamento e as trabas burocráticas, agrega, fan máis difícil manter as instalacións nun estado adecuado para desenvolver proxectos de investigación.
A falta de apoio institucional a estas iniciativas, sinala doutra banda García Berrio, non é algo específico de Galicia senón de toda España. «Por colegas nosos que traballan en Francia ou Italia sabemos que neses países hai un compromiso importante das administracións para soster este tipo de proxectos científicos», comenta. «A nós gustaríanos contar tamén cunha fonte segura de financiamento e non ter que pasar tantos traballos para buscar fondos, porque así poderíamos dedicar máis tempo e esforzo á investigación», conclúe.