Terras Gauda busca biopesticidas para acabar coas pragas de viñedo e oliveira
AGRICULTURA
A adega participa nunha investigación para reducir o uso de fitosanitarios
26 novs 2020 . Actualizado ás 09:24 h.A terra e o viñedo están na orixe de todos os viños que se elaboran en Terras Gauda. Por iso esta adega priorizou sempre a preservación da contorna e acadar unha maior sustentabilidade ambiental nas 160 hectáreas de viñedo propio que cultiva. De forma paralela, participa nunha infinidade de proxectos de investigación destinados, precisamente, a tratar de reducir o seu impacto ambiental. O último ao que se sumou chámase Novaterra e está dirixido por un consorcio europeo no que participan 19 empresas e grupos científicos. O seu obxectivo, reducir o uso de fitosanitarios tanto no viñedo como no oliveiral.
A iniciativa arrincou o pasado 27 de outubro e nela colaboran socios de España, Portugal, Italia, Grecia e Bélxica. Centros de investigación, parques tecnolóxicos, empresas, institucións gobernamentais e universidades abordarán, de forma transversal e cunha perspectiva multidisciplinar, a procura de novas estratexias sostibles e integradas, que sexan viable técnica e economicamente, para eliminar ou reducir a máximo o uso de pesticidas tanto no viñedo como na oliveira.
A intención é a de achegar solucións para desenvolver produtos naturais que protexan as plantas, tales como biopesticidas ou sistemas de biocontrol. Tamén se creará unha plataforma de agricultura intelixente, para unha maior precisión na aplicación de tratamentos. Para rematar, deseñaranse novas técnicas de xestión do chan e estratexias de biodiversidade funcional e robótica para a xestión das malas herbas, co fin de conseguir cultivos máis sans. As medidas de xestión terán en conta as peculiaridades ambientais, sociais e económicas das diferentes empresas e profesionais da viticultura, adaptándose ás diferentes rexións edafoclimáticas, o que permitirá mellorar as estratexias do manexo integral das pragas. «Os proxectos de investigación que temos en marcha están orientados a preservar o que tanto achega aos nosos viños: o terruño, as nosas esencia. Mellorar a súa sustentabilidade é fundamental para Terras Gauda. Na actualidade apostamos por compartir experiencias e coñecementos con adegas e grupos científicos doutros países e latitudes. Parécenos moi interesante», explica Emilio Rodríguez Canas, director enológico da adega. O proxecto posto agora en marcha terá unha duración de catro anos e conta cun orzamento superior aos 5,5 millóns de euros, 4.8 deles con cargo ao programa Horizon 2020, da Comisión Europea. As solucións que se buscan con esta investigación están aliñadas coas necesidades actuais do mercado, a sensibilidade dos consumidores e a lexislación europea. O consorcio está liderado polo Instituto de Investigación IRTA.